23 май – Тичмаш тылзе.
Марий кумалтышын чинче тушыжо:
Калык верч чоклымаш:
«Поро Ош Кугу Юмо, калыкемын чонжым нӧлтӧ, вияҥде, чумыро. Пырля погынен, ушнен, икте-весылан полшен, ваш-ваш йӧратен, вычыл-вычыл илаш туныкто».
«Мланде Ава, шке игет-влакым таза-эсен ончен кушто, порын ашне. Ончылнет осал, йоҥылыш лиймемлан савырым ыште, пореш колто. Пукшо, йӱктӧ, таза-эсен илаш полшо. Еш дене, пошкудо дене, родо-шочшо дене, марий калык дене, тӱня калык сай-порын илаш полшо».
ЭрВел Семонын (Новиковын) «Сандалык – Ош Кугу Юмо» книгаж гыч налме.
Черке йӱла почеш:
21май – Апостол да евангелист Иоанн Богословын кечыже.
22 май – Святитель Николай Чудотворецын кечыже. Волжск оласе соборын да Звенигово оласе, Кужэҥер, Марий Турек районысо Мариец, Медведево районысо Сурок посёлкыласе, Килемар районысо Актаюж, Марий Турек районысо Косолоп, Звенигово районысо Кожласола, Курыкмарий районысо Микрӓк селасе храм-влакын пайремышт.
23 май – Апостол Симон Зилотын кечыже.
24 май – Апостол-влак дене иктӧр улшо Мефодий ден Кириллын, славян калыкын туныктышыштын, Москван да уло Российын Святейший Патриархше Кириллын святойжын кечышт.
25 май – Священномученик Ермогенын, Москван да уло Российын патриархшын, кечыже.
Молитва
«Юмо, эрык але эрык деч посна, мут але паша дене, шинчен але шинчыдыме, кечывалым але йӱдым, уш але шонымаш дене ыштыме мемнан сулыкнам лушкыдемде, кудалте, касаре. Чылажымат касаре мыланна, Тый вет Айдемым йӧратыше поро кумылан Юмо улат».
«Марла молитва-влак» книга гыч налме.2005 ий
Калык пале:
Куку мураш тӱҥалеш – шокшо игече толеш.
Шӧршудо вараш кодын пеледеш – кеҥеж кукшо лиеш.
Йодшо еҥлан отказыман огыл – пиал туп дене савырнен кертеш.
Сай лектышым налнет гын, пакчасаскам у тылзын шындыман.
Еҥын солыкшо дене ӱштылалташ огеш кӱл, уке гын весын йоҥылышыжлан мутым кучаш логалеш.
Шарнаш кодшо ой:
Кажне еҥ шке кӱсенже семын корным тошка.
Кадыр нымыштын нийже кадыр ок лий.
Йыр корнеш ярнет, вик корнеш пижат.
Йылман деч от тунем гын, йылмыдыме туныкта.
Йӱмет годым, авагаштам ончал.
Йӧрым кочкеш йӧнан еҥ, оксам куча поян еҥ.
Йӧратымаште чон ден уш тӧр огыт шого.
Фен-шуй почеш:
Сурт ма пачер омса гоч тендан илышыш энергий пура. Сандене тиде верым сылным, кумылым налшым ышташ тыршыман. Мотор кушкылым, сӧрастарышым вераҥдаш кӱлеш, тек тендан деке толшо ешдан энергетикыжым шижеш. Садыже уэмдалт шогыжо манын, ты кумдыкым эреак тӱзатыман.
С.Носова ямдылен
Снимкыште: Чарла кремльыште – Йӧратымаш да шонымым шуктышо пушеҥге.
Авторын фотожо
