14 июньышто Марий Элым вуйлатыше Э.Сапаев лӱмеш кугыжаныш академический опер да балет театрыште медицине пашаеҥ-влакым саламлен.
«Тазалык аралтыш аланысе событий-влак Марий Элыште илыше кажне еҥ дене чак кылдалтыныт. Медицинын сеҥымашыже – тиде мемнан гражданна-влакын ӱшанышт, нунын тазалыкышт да сай илышышт верч тыршымаш», – торжественный мероприятийыште палемден Юрий Зайцев.
2023 ийыште Марий Эл Тазалык аралтыш министерстве тӱҥ шотышто национальный проект-влакым илышыш пуртымо пашам шуктен. Тидлан ойырымо 2 млрд. утла теҥге дене калыкым медицине велым сайынрак обслуживатлаш тӱҥалме, кугу показательыш шумо да республикын отрасльжым посна направлений-влак дене ончыл радамыш лукмо.
Ю.Зайцевын мутшо почеш, регионышто медицине кадрым ситарышашлан ятыр мере ышталтеш: школлаште эше кум медицине классым почмо, медицине пашаеҥ-шамычлан служебный илыме вер да 2024 ий гыч илыме верым саемдаш 3 млн. теҥге кугыт социальный выплате ойыралтыт, тыгак должностной оклад пелен ешартыш выплате палемдалтеш, илыме-коммунал услугылан тӱлымӧ роскот пӧртылталтеш, «Ялысе доктор» да «Ялысе фельдшер» программе-влак илышыш пурталтыт. Чыла тиде калыклан медицине полышым лишемдыме да саемдыме шот дене шукталтеш.
2025 ийыште отрасль ончылно кугу задаче-влак шогат. Нуно Россий президент Владимир Путинын «Еш», «Кужу да чолга илыш», «Тазалыкым аралыме у технологий-шамыч» у национальный проектлаште палемдыме цель-влакым шуктымашке виктаралтыныт.
«Ончылныда шогышо чыла неле задачым шуктеда манын ӱшнем. Таза лийза, чыла шонымашда шукталтше, тыландат, лишыл еҥда-влакланат чыла сайым гына тыланем», – манын Ю.Зайцев да медицине пашаеҥ-шамычлан тӱрлӧ наградым кучыктен.
«За заслуги перед Марий Эл» II степенян орден дене Йошкар-Оласе медицине колледжын директоржо Леонид Рыжков палемдалтын, «За заслуги перед Марий Эл» орденын медальже дене – Республиканский клинический больницын тӱҥ врачше Андрей Глазырин.
«Марий Элын сулло врачше» чап лӱмым Волжск оласе рӱдӧ больницын травматологический отделенийжым вуйлатыше — врач травматолог-ортопед Рафаэль Гибадуллинлан, Суд-медицине экспертизе бюрон комплексный экспертизе пӧлкажым вуйлатыше — суд-медицине эксперт Сергей Деревяшкинлан, Йошкар-Оласе 1-ше №-ан поликлиникын кечывал стационаржым вуйлатыше — врач-кардиолог Елена Пономаренколан пуымо, «Марий Эл Республик тазалык аралтышын сулло пашаеҥже» чап лӱмым – Козьмодемьянск район-влак кокласе больницын тӱҥ врачше Николай Сидоровлан. Марий Эл правительствын Чап кагазшым Советский районысо рӱдӧ больницын участковый поликлиникыжын врач-терапевтше Юлий Селёдкинлан кучыктымо.
Марий Эл вуйлатышын Таумутшым Медведево районысо рӱдӧ больницын терапевтический отделенийжын кугурак медсестраже Людмила Бурмистровалан, Регионысо вӱргорно рӱдерын неотложный кардиологий отделенийжын реанимаций да интенсивный терапий палатыжын медсестраже Зинаида Вершининалан, Республиканский клинический онкологический диспансерын рентген отделенийжым вуйлатыше — врач-рентгенолог Дмитрий Пасынковлан, Марий Турек районысо рӱдӧ больницын врач-лаборантше Галина Стяжкиналан увертарыме.
Марий Элым вуйлатышын пресс-службыжын уверже негызеш М.ИВАНОВА ямдылен
