2 ноябрьыште республикысе Сӱретсымыктыш тоштерыште «Марий кундем» выставке почылтын. Кажне ийын ты ончерыш Россий сӱретче-влак ушемын Марий Элысе пӧлкашкыже пурышо профессионал ден самырык сӱретче-влак шке радынаштым калык ончыко аклаш луктыт.
Ончерым почмаште Марий Эл правительстве председательын алмаштышыже – тӱвыра, савыктыш да калык-влакын пашашт шотышто министр Константин Иванов лийын. Тудо погынышо-влаклан ты выставкын кӱлешан улмыжым палемден. Ты ончер самырык сӱретче тукымлан кушкаш полша манын каласен.
Ончерыш скульптурым, юмоҥам, вургемым, пейзажым, натюрмортым чумырымо. Поснак марий йомак гыч герой-влакым сӱретлыман футболко молын деч ойыртемалтын. Выставкыште молгунамсе семынак лӱмлӧ сӱретче-влакын пашашт воктене самырык-шамычынымат ужаш лиеш. Кызыт Российысе самрык художник-влакын ушемыштын Марий Элысе пӧлкашкыже 40 самырык сӱретче пура. Нуно марий школын направленийже-влакым умбакыже шуят манын, ӱшан уло.
Живописьым аклыше-влак «Марий кундем» выставкыште йӧратыме сӱретче-шамычын пашаштым ужын кертыныт. Теве Юрий Таныгинын «Волгыдылыкым кондышо» радынаштыже суксын шулдыр йымакыже логалына. Россий Федерацийын сулло да Марий Элын калык сӱретчыже Иван Ямбердовын «Ончалтыш. Тошто ден ончыкылык» сӱретше гыч мемнан ӱмбак кова ден ӱдыр ончат. Тудо илыш нерген шонкалаш тарата. Моло сӱретче-шамычын радынаштат сымыктышым йӧратыше еҥым воктенышт чарналташ, тӱткын ончалаш, шымлаш таратат. Икманаш, выставкыш мийыше тыште шкаланже келшыше да чонжылан лишыл пашам муын кертеш.
Михаил СКОБЕЛЕВ,
Лидия ШАБДАРОВА
М.Скобелевын фотожо
