УВЕР ЙОГЫН

«Курымашлык полк»

Парад деч вара вигак «Курымашлык полк» гражданско-патриотический акций эртен. Молодёжный политике, спорт да туризм министерствын, «Юнармий» йоча военно-патриотический мер толкынын да «Волонтеры Победы» всероссийский мер организацийын регионысо пӧлкажын эртарыме ты акцийыш тений 25 тӱжем еҥ ушнен. Кок ий тыгай йӧнжӧ лийын огыл. Ончылгоч палемдыме маршрут дене Ленин проспект, Комсомольский, Пушкин, Первомайский уремла гоч Рӱдӧ каныме парк марте ошкылыныт. Варажым акцийыш ушнышо-влак Воинын чап мемориалыш пурышо шарныктышла воктеке пеледышым пыштеныт.
Регион вуйлатышынат акийыш ушнен. Тудо кидыштыже Марий Элын шочшыжо, Совет Ушем Герой Василий Степанович Архиповын (1939 ийыште тудо сарыш каен) портретшым кучен. Ончыч Советско-Финляндский сарыште (1939-1940 ий), вара Кугу Отечественный сарыште участвоватлен. Блинов лӱмеш 5-ше Ставропольский кавалерийский дивизий дене пырля тӱрлӧ вере кредалын. Шке вуйжым тале пулемётчик 1941 ий 30 декабрьыште Москвам аралыме верч кредалмаште пыштен. 1942 ийыште тудлан Совет Ушем Герой лӱмым пуымо нерген указ лектын.
Акцийыш ушнышо кажне еҥ сарыште участвоватлыше родо-тукымжын фотосӱретшым нумал эртен. Кажныж деке миен эҥертен, нунын нерген каласкалаш йодат гын, илыш пӱрымаш историйыштым пален налаш лийын. Икмыняр еҥ дене мыят палыме лийым. Теве Антон Сеногноев Кирилл эргыж дене шкенжын родо-тукымжо-влак М.Ф.Ишанбаевын, Н.И.Плаксинын да Д.Д.Стояновскийын портретыштым нумалын. Кажныж нерген кугешнен каласкалыш.
А теве Елена Петрова марийжын ача-аважын Е.Г.Петрова ден И.П.Петровын портретыштым кучен. Вате-марий коктынат сарыш каеныт, тӱрлӧ вере служитленыт, но 9 майыште Германийыште вашлийыныт. Петровмыт коча-коваштын пӱрымашышт нерген архивлаште материалым кызытат кычалыт.
А ик ӱдырамаш мыланем нимат каласен ыш керт. Логарышкыже кочо комыля толынат, вара веле эркын лыпланыш. Кидыштыже Михаил Иванович Глушковын портретше лийын. 77 ий эртен, а тудо шучко пагыт деч шарнымашыже алят чонжым ишыкта…
С.Носова

Опубликовать в Одноклассники

Добавить комментарий