УВЕР ЙОГЫН

Кандашымше гана

Шернур район Марисолаште «Йыван Кырла лудмаш»
VIII республиканский шанче-практик конференций эртен.

Тений тудо Марий кундемын социокультурный вияҥмаштыже этнический факторым шымлыме йодышлан пӧлеклалтын ыле. Мероприятий тӱҥалме деч ончыч участник-влак Купсола ялыште да Марисола селаште Йыван Кырлалан шогалтыме памятник-влак воктеке пеледыш аршашым пыштеныт. Конференцийыш погынышо-влакым Марий Эл правительстве председательын икымше алмаштышыже М.Васютин, Шернур муниципал районын главаже С.Адиганов, тӱвыра, савыктыш да калык-влакын пашашт шотышто министрын алмаштшыже И.Садовин, МарНИИЯЛИ директор Л.Григорьева саламленыт.

Пленар погынымаште кум доклад йоҥгалтын. Филологий науко кандидат А.Илларионов Тӱп калык-влакын йылмыштын тӱнямбал луияшым палемдыме дене кылдалше могай мероприятий-влак эртаралтме нерген палдарен.  Историй науко кандидат С.Свечников XVII курымысо марий да руш этнический контакт-влакым шергалын. Россий Писатель ушемын еҥже, Марий Элын калык поэтше З.Дудина Марий Эл кугыжаныш архивын фондшо гыч Йыван Кырлан творческий биогорафийже дене кылдалтше у факт-влакым кычал мумыж дене палдарен.

Варажым конференций шке пашажым куд секцийыште шуен. Марий кундемын историйже, калыкнан вияҥмаште йылмын, образовательный учрежденийлан пашаштыже традиционный культурын верышт, республикыште илыше калык-влакын сылнымутышт, кызытсе илышыште акрет йӱлам арален кодымо да моло йодыш нергенат чылаже 50 доклад йоҥгалтын да каҥашалтын. МарНИИЯЛИ-н шанчызе-шамыч ты конференцийыште поснак кугу чолгалыкым ончыктеныт.

С.Носова

Фотом МарНИИЯЛИ-н сайтше гыч налме.  

Опубликовать в Одноклассники

Добавить комментарий