Волжск олаште да Памар селаште куанле событий: аварий лӱдыкшан пӧртла гыч вес илыме верыш куснышо да тулык йоча-шамычлан Марий Эл вуйлатыше у пачер деч сравочым кучыктен.
Шукерте огыл Волжск олаште индеш пачашан пӧртым чоҥен шуктымо, тусо 53 пачерым аварий лийын кертме лӱдыкшан илыме вер гыч граждан-влакым кусарыме программе почеш шеледыме, кумдыкшо – 2,8 тӱжем квадратный метр.
Пачер-влакын чумыр акышт 150,8 миллион теҥгеш шуын, тышеч 147 миллион теҥгеже Илыме вер ден коммунал озанлыкым уэмдаш полшышо фонд деч ойыралтын.
Тений тулык йоча-влак эше 22 пачерыш илаш пурат. Нунылан ойырымо илыме верын акше – 35 миллион теҥге утла.
Марий Эл вуйлатыше Юрий Зайцев у пачер деч сравочым кучыктен, чылаштым пӧртсий дене саламлен, пиалым да улан илышым тыланен.
Тудо палемден: аварий лӱдыкшан илыме вер фондым иземдымаш, тулык йоча-шамычлан пачерым ойырымаш Россий Федерацийын, тыгак Марий Элын правительствыштын эн ончыч шуктышаш задачыштлан шотлалтыт.
«Тачысе кечылан ончымаште 83 тӱжем квадратный метр кумдык аварий лӱдыкшан илыме верым кораҥдыме. Планын 82 процентше лиеш. Чылаже 5,5 тӱжем еҥым вес вере илаш кусарыме. Программе почеш 6897 еҥлан илыме верым ойырыман. Идалык мучаш марте 9 муниципал образованийыште шуко пачеран 11 пӧрт чоҥалтеш. Тыге 2017 ий 1 январь марте аварийныйлан шотлалтше пӧртлаште илыше граждан-влакым вес илыме верыш кусарен шуктена, тугеже программе тӱрыснек илышыш шыҥдаралтмылан шотлалтеш», – каласен Юрий Зайцев.
23 августышто Волжский районысо Памар селаште кугу событий погынышо калыкым куандарен. Тыште 18 тулык йоча илыме веран лийын. Марий Эл вуйлатыше нунылан сравочым кучыктен.
«Пачерым шке шонымыда семын келыштарен кертыда, тушто ласкалык да пиал шӱлышым ыштыза. Тек тендан пӧртда лишыл еҥда да ӱшанле йолташда-влакын вашлийме верышкышт савырна», – тыланен Юрий Зайцев.
2019 гыч 2022 ий марте да 2023 ийын икымше пелийыштыже 956 тулык йоча пачеран лийын, рашемден республик вуйлатыше. Ты паша умбакыже шуйна манын ӱшандарен тудо.
Марий Эл Республикым вуйлатышын администрацийжын информаций паша пӧлкажын уверже негызеш Л.СЕМЕНОВА ямдылен
Д.РЕЧКИНЫН фотожо
