Шукерте огыл Менделеевск олаште С.Гассар лӱмеш тӱвыра полатыште марий самырык тукымын «Йӱлам арален» фестивальже эртен.
Мероприятийым «Шып лий» псевдониман артист сӧрастарен. Участник-влакым Татарстанысе марий-влакын калыкле-тӱвыра автономийыштым вуйлатыше Наталья Кукушкина саламлен.
Фестивальын программыже поян лийын. Т.Евсеев лӱмеш национальный тоштер «Марий орнамент: у ончалтыш» куснылшо ончерым намиен. Тудым 2022-2023 ийлаште илышыш шыҥдарыме Росмолодёжын грантше кӱшеш «Самырык-влакын этнолабораторийышт» проект почеш ямдылыме. Тушко самырык дизайнер-влакын, тоштерысе марий тӱр коллекций-влаклан эҥертен, кызытсе жаплан келшыше вургем эскизлам пуртеныт. Тидыже фестивальын участникше-шамычлан поснак келшен. Моло образовательный мероприятий-шамычат оҥайын эртеныт. Тӱрлӧ мастер-класс, модыш, этнодискотеке кумылыштым нӧлтеныт.
Наталья Кукушкинан палемдымыж почеш, фестивальыште кажныже шкенжым ала-мо кугу да кӱлешан ужаш семын шижын кертын.
Форумышто Набережные Челны ола гыч кидмастар Марина Ахмадуллова шкенжын ыштыш-кучышыжым ончыктен. Дизайнер кызытсе жаплан келшыше марий тӱран ойыртемалтше вургемым, сумкам, сӧрастарышым ышта. Нуным ончыкташ Набережные Челны ола гыч «Марий сем» ансамбльын ӱдыржӧ-влак да ты оласе марий-влакын НКА-жым вуйлатыше Евгений Селезнев полшеныт.
Снимкылаште: Марина Ахмадуллован ыштыш-кучышыжым ончыктымо годым.
Фотом «Марийцы Татарстана и Казани» воткыл лаштык гыч налме.
