19-20 июньышто Йошкар-Олаште Пеледыш пайрем эрташ тӱҥалеш.
Тений тудо Российысе калык-влакын икоян улмо идалыклан пӧлеклалтеш. 5 июнь марте тушко ушнаш шонышо регионысо да эл мучко марий-влакын тӱшкан илыме кундемлаж гыч усталык коллектив, кидмастар-влак деч йодмашым погат.
Пеледыш пайремыште «Марий кудо», «Гармонь сем» конкурс-влак лийыт. «Кидпаша тӱня» ярмиҥга, спорт таҥасымаш, йоча модыш алан-влак пашам ышташ тӱҥалыт.
«Икоян ме улына!» калык усталык кугу концертыште шкем ончыктышо коллектив-влак 10 минуташ кок художественный номерым – куштымаш ден калык мурым – ямдылышаш улыт.
Пайремым Калык усталык да тӱвыра ден каныме паша шотышто шанче- методике рӱдер Марий Элын Тӱвыра, савыктыш да калык-влакын пашашт шотышто министерствыже да Мер Каҥашын полшымышт дене эртара.
Республикысе муниципал образованийлаште Пеледыш пайрем тӱҥ шотышто 12 июньышто эртат. А теве Медведево районышто пайрем-влак 6 июньышто, Параньга районышто (Ляжбердино ял) 13 июньышто да Килемар округышто («Кугезе мланде» маналтеш) 4 июльышто лийыт.
Курыкмарий районышто «Пеледӹш айо» муро пайрем тыгак 12 июньышто Троицко-Посадский ял шотан илемын Сиухин аланыштыже лиеш. Тудынат програмыже поян. Вокально-хоровой коллектив-влакын конкурсышт, калык вургем фестиваль, кидпаша ярмиҥга, ялозанлык технике ончер, тӱрлӧ спорт таҥасмаш, йоча модыш да патриот шӱлышаш акций-влак эртат.
Михаил Скобелевын фотожо.
