МАРИЙ ТӰНЯ

Йодыштмаш: 26 апрель –Марий талешке кече

Шкендан илыме кундемыште Талешке семын аклышашлык еҥ-влак улыт мо? Улыт гын, молан тыге шонеда?
Валерий Галкин, Советский районысо Ӱшнур школ директор, Марий Элысе образованийын сулло пашаеҥже да Марий Элын калык туныктышыжо:
– Шкенан кундемын икмыняр шочшыжым Талешке семын ончыктен кертам. Мутлан, филологий науко доктор, профессор, калык просвещенийын отличникше, Марий Эл Республикысе наукын сулло деятельже, РФ-се кӱшыл профессиональный образованийын почётан пашаеҥже Анатолий Николаевич Куклиным. Илымыж годым шуко сай пашам ыштен. Вес Талешке – композитор, Марий АССР, Татарстан да РСФСР искусствын сулло деятельже Анатолий Борисович Луппов. Тудо – «Лесная легенда» икымше марий балетын авторжо. Шуко марла мурым возен, тыгак мемнан школланат. Ӱшнурыштӧ Петр ден Павел святой-влак лӱмеш черкынам олмыкташ манын, тудак «Тӱвыра поянлык» федерал программыш пурташ полшен. 2019 ийыште толын кайымыж годым тудо шкежат ойлен: «Казаньыште илем гынат, чонемже – Ӱшнурыштӧ». Шочмо кундемжым тудо эре шарнен.
Раисия Николаева, республикысе Марий тӱвыра рӱдерын пӧлка вуйлатышыже, Марий Элын сулло журналистше:
– Кызытсе жапын Талешкыже-влаклан СВО-што эргыштым йомдарыше ава-влакым шотлем. Эн шергаканыштым поген пыштымеке, илышын ямжым нуно вес ача-аван СВО-што улшо эргыштлан полшымо дене сылнештарат. Кеч ик татланат шӱм пелен нумалме, шке илышым чаманыде, элнан чекшын тичмашлыкшым аралыше йочаштым огыт мондо, кушкын шогышо самырык тукымым тиде примереш куштат. Нунылан тазалыкым, пеҥгыдылыкым тыланем.
Вячеслав Осипов, Волжский район гыч самодеятельный мурызо да композитор:
– Юлсер кундемыште Талешкылан мый Пӧтъял школ директор Валериян Аркадьевич Семёновым шотлем. Тудын гай ушан-шотан, ончыко ужын, шижын моштышо, кумда тӱняончалтышан, умылымашан вес вуйлатышым ом пале. Нигӧлан ӧпкем кучыде, йӧратыме пашашкыже пӧртылын. Вулатыме организацийжын чапшым угыч нӧлталын. Кызыт районышто да республикыште гына огыл, Юл кундем регионышто кӱшнӧ куча. Шкаланжат чап лийже!
Алевтина Баязитиова, Пошкырт Республик Калтаса район Амчемучаш ялысе йочасад пашаеҥ, ныл почеламут сборникын авторжо:
– Тачысе кечылан Талешке семын мый шкемын шочмо Амчемучаш ял гыч Анатолий Георгиевич Паяшевым ончыктынем. Тудо кажне землякшын чонешыже герой семын кодеш. Ӱмыржӧ тений Украин мландыште кӱрылтын. Мемнан ял калык тудым эре шарнен илаш тӱҥалеш. Анатолий 1971 ий 10 февральыште шочын да 2024 ий 28 январьыште колен.
Николай Сидоркин, У Торъял районысо Немда Овалже ялыште илыше пенсионер, чолга мер пашаеҥ:
– Марий Талешкылан эре пӧръеҥым шотлат. А ме, шым иза-шоляк Сидоркинмыт, шкенан авана Татьяна Никитична Сидоркинам шотлена. Тынар эргым шочыктен, туныктен луктын, йол ӱмбаке шогалтен! Чылан шочшан-уныкан улына. Шешкыштат ушан-шотан, тунемше улыт. Авана – Немда кундемлан пагалыме айдеме. Шуко медальже уло. 84 ияш аванам ме моткоч йӧратена, пагалена да жаплена. Эше шуко ийым иле да пеленна лий, авай!
Снимкыште: Т.Сидоркина шым эргыже коклаште.
Фотом Сидоркинмыт еш альбом гыч налме.
С.Носова ямдылен

Опубликовать в Одноклассники

Добавить комментарий