Калмыкий Республик гыч делегацийым Марий Элысе тунемме вер-влакын паша опытышт дене палдареныт.
Регион-влак кокласе тыгай вашкыл Россий калык-влакын икоян улмо идалыкыштышт поснак кӱлешан. Каҥашымаш агрообразованийым вияҥдыме нерген лийын. Тач ты шотышто Марий Эл уло мом ончыкташ да мо дене кугешнаш. Регионын Образований да науко министерствыже республикысе Ялозанлык да кочкыш сату министерстве дене пырля «Кочыш сатум технологий полшымо дене лӱдыкшыдымым ыштымаш» нацпроектын «АПК-ште кадр» федеральный проектше почеш кундемысе тунемме верлаште агрокласс-влакым почыныт.
«Кызытлан 13 муниципалитетын 22 школыштыжо 26 агротехнологический класс уло, тушто 350 наре икшыве тунемеш. 2030 ийлан агрокласс-влакын чотыштым 81 марте кугемдаш палемдыме. Ончыкыжым нунылан жаплан келшыше оборудованийым налына. 2025 ийыште Ялозанлык да кочкыш сату министерстве ден инвестор-влак полшымо дене пырля кок школлан тыгай оборудованийым налме, 2026 ийыште эше кум школлан налына», – каласен Марий Эл образований да науко министр Лариса Ревуцкая.
Калмыкий гыч толшо делегаций – 13 туныктышо да кум чолга тунемше – кум кече жапыште республикысе икмыняр тунемме верыште лийын. Вашлиймаш «йыргешке ӱстел» дене мучашлалтын.
Г.Кожевникова
Фотом Марий Эл Образований да науко министерствын соцкылысе лаштыкше гыч налме
