Юл кундем кугыжаныш технологий университетын пашаеҥже ден студентше-влак специальный военный операций тӱҥалтыш гычак тушто илаш-колаш кредалше военнослужащий-шамычлан полышым пуымашке ушненыт. Ты сомылым вуз умбакыже шуя: волонтёр-влак гуманитар полышым погат, учёный-шамыч фронтлан кӱлешан устройствым да молым шонен луктын ямдылат да мемнан боец-влаклан колтат.
Гуманитарный образований факультет «Орда» телеграмм-канал дене пырля арня еде кажне вӱргечын университетын икымше корпусыштыжо гуманитар полышым пога. Тиде пашам специальный военный операцийын чарнымешкыже ышташ палемдыме. Фронтыш чумыр налмаште 430 грузым колтымо. Тиде – шокшо вургем, БПЛА-лан аккумулятор, спальник, грелке, тӱрлӧ кочкыш, генератор-шамыч, тыгак медикамент, мушкылтмо средстве.
Вузын учёныйжо-влакат ӧрдыжеш кодын огытыл. Инжиниринг да дизайн рӱдерыште нуно 3D печать полшымо дене универсальный накольник ден хвостовик-шамычым ямдыленыт. Тӱжвачын ончымаште боеприпасын нине элементше-влак изи веле улыт, но тушман ваштареш кредалмаште рольышт кугу.
«Уло эллан неле жапыште мемнан ончылно кугыжанышын шындыме тӱҥ задачынам решатлена: инженерно-технический направлениян специалист-влакым ямдылена. Тыгак Российын технологий суверенитетшым пеҥгыдемдаш, элнан экономикыжым вияҥдаш, фронтышто улшо боец-влаклан полшаш разработко-влакым ыштена. Боеприпасын элементшым ямдылыме годым инноваций йӧным кучылтынна, тидлан кӧра сатун роскотшо иземеш да йот элласе поставщик-шамыч деч кораҥына. Специальный военный операцийын цельышкыже шуаш манын, кажнына кертме семын полшышаш», – каласен вузын ректоржо Игорь Петухов.
Ямде продукций ветеран-влакын «Боевое братство» всероссийский обществыштын Марий республикысе пӧлкажлан пуымо да специальный военный операцийын эртыме кундемышкыже колтымо.
Г.Кожевникова
Фотом вузын сайтше гыч налме
