16 мартыште Йошкар-Олаште «Единый Россий» партийын ончылгоч йӱклымаш шотышто оргкомитетшын икымше заседанийже эртен.
Тушто тыге мутланен келшеныт: ты йӱклымаш онлайн формат дене эрта. Тидын нерген оргкомитет председатель Александр Смирнов каласен.
Тудын ойлымыж почешак, кандидат-влак деч документым 29 апрель марте налыт.
Республикыште илыше-влакын 24-ше гыч 30-шо май марте онлайн формат дене йӱклаш йӧнышт лиеш. «Единый Россий» партийын Марий региональный отделенийжын секретарьже Александр Гречихо тиде йӱклымашке шукырак мер организаций гыч еҥ-влакын ушнышашытлан тӱткышым ойыраш кӱлмым палемден.
– 19 сентябрьыште, Йӱклымӧ единый кечын, Кугыжаныш Думыш сайлымаште да вес кӱкшытан избирательный кампанийлаште партий деч кӧ лиймым избиратель-шамыч палемдат. Вес семынже, ончылгоч йӱклымаште кудо кандидат-влаклан утларак йӱкым пуат, нунак шке вийыштым терген кертыт. Мутат уке, тидыже – кандидатур-влаклан пеш серьезный ошкыл да политический карьерлан сай тӱҥалтыш, – палемден Гречихо.
15 мартыште Москваште «Единый Российын» ончылгоч йӱклымашын федеральный оргкомитетшын составшым пеҥгыдемденыт. Шукырак участникше общественник улыт. Оргкомитетын кокымшо заседанийыштыже ты пашам регионлаште эртареныт. Марий Элыште оргкомитетын составышкыже 12 еҥ пурталтын.
Тудын участникше-влак шотышто йодмашымат рашемденыт: кандидат 21 ий деч кугурак ийготан лийшаш, эре Российыште илышаш, вес эл-влакын гражданствышт, йот эллаште активше да судитлалтше лийшаш огыл.
15 март гыч ончылгоч йӱклымаш шотышто процедурын официальный сайтше пашам ышташ тӱҥалын: http://pg.er.ru. Тушто ончылгоч йӱклымаш да тудын участникше-влак нерген уверым пален налаш лиеш.
Ончылгоч йӱклымашын иктешлымашыжым июнь тӱҥалтыште ыштат. Кандидат-влакын тичмаш спискыштым партийын съездыштыже пеҥгыдемдат. Тудо июнь кыдалне лиеш.
Л.КАМАЛЕТДИНОВА
