КУЛЬТУР ДА ИСКУССТВО

Календарьым, ужавам, вуйгоркам да молымат

Илышыште кажне еҥ мом-гынат пога, коллекцийым чумыра.

Йолташ-влак, а те тыгай пашалан кумылан улыда?

Светлана ПЕХМЕТОВА, Марий Элын сулло журналистше:

– Марий тематике дене кылдалтше календарьым чумырем. Мутлан, марий вургем, йӱла, тӱвыра дене кылдалтше-влакым. Марла календарь 1995 ий годсо аралалтеш. Тыгак вес калыкын илыш-йӱлаштым ончыктышо календарьым ужам гын, коллекцийышкем пыштем. Студент пагыт гыч театрыште ончымо спектакль-влакын программкыштымат ом кышке. Икмыняр ий ончыч калык вургеман курчак сувенирым погаш тӱҥалынам. Кызытеш марий, удмурт, мордва да кавказ чиеман улыт.

Марина ПОЧТЕНЕВА, Марий Элын сулло артистше:

– «Папамын шӱндӹкшӹ» программемлан тошто вургемым погенам: тувыр-шовырым, шарпаным, шовычым да молымат. Чылаже ик шондыкым теменам. Нуно XIX курым годсо улыт.

Лидия СЕМЁНОВА, Марий Элын сулло журналистше:

Ик жап фэн-шуй мылам оҥайын чучын. Тушто ужава оксам кондышылан шотлалтеш. Тыге мыят ужавам погаш шонен пыштышым. Вес амалжат ыле: «Ямде лий» газет редакцийыште ыштыме годым ик лудшына пеш мотор ужавам пидын конден ыле. Лач тудо коллекцийлан тӱҥалтыш лие. Кызыт изижге-кугужге 200 наре ужавам уло, утларакше – ужар тӱсан.

Ӱдырем, шӱжарем да палымем-шамычат пӧлек шотеш  але тыглаят ужавам конденак шогат, шкеат ужмем еда наледем.

Эльвира КУКЛИНА, этноблогер:

– Мылам этностиль моткоч келша, сандене тӱрлӧ сӧрастарышым чумырем. Эше пытартыш жапыште этноблогер семын #всёначинаетсясбраслетаоберега тыгай хештег дене путешествий нерген соцсетьлаште возем. Тидым кидшол гоч почам. Кеч-кушко каем гынат, ты вер дене кылдалтше кидшолым муаш тыршем. Тыгодымак мылам ты кидшолым ыштыше мастар еҥ нерген пален налаш келша.

Мо оҥайже, тыгайым чумыраш тӱҥалмеке, еҥ-влак, тидым палыдеак, пӧлеклаш тӱҥалыныт. Теве кодшо кечылаште Москош мийымем годым Свердловск кундем гычат лӱмынак Урал самоцветан кидшолым конденыт.

Анна САННИКОВА, Йошкар-Оласе художественный училищын преподавательже,  сӱретче:

– Насекомый-шамычым погем. Нуно ойыртемалтше тӱсан да форман улмышт дене ӧрыктареныт. Иктаж шым ий ончыч ты пашалан кумылаҥынам. Кызыт коллекцийыштем Российын тӱрлӧ кундемлаж гыч 10 копшаҥге да 15-20 лыве уло. Тиддеч посна эше вуйгорка-влакым погем. А нунышт изи черепахын гыч тӱҥалын дельфинын, ирсӧснан марте улыт, кайык-шамычынат ятырак. Анатомийым да формым палыме пашаштемат моткоч кӱлешан, вет тыгай «скульптур пӱртӱсын полшымыж» дене ышталтеш. Тыгай коллекцийым визымше ий чумырем.

Эвика СИВАКОВА, Сцене искусство дене Россий кугыжаныш институтын (Санкт-Петербург ола) выпускницыже, «Именно» интернет-журналын пашаеҥже:

– Лӱмынак нимом ом пого, но театрла гыч билет-влакым да программкым ом кышке.

А.БАЙКОВА ямдылен

Фотом интернет гыч налме

 

 

Опубликовать в Одноклассники

Добавить комментарий