КУЛЬТУР ДА ИСКУССТВО

ИЗАК-ШОЛЯК ШАБДАРОВМЫТ –МАЛАХОВ ДЕНЕ

 Шернур район Марисола кундем Купсола гыч йыгыр изак-шоляк Никита, Алеша да Илья Шабдаровмытым районысо, республикысе тӱрлӧ фестивальыште ужынна, Россий кӱкшытан мероприятий гычат ятыр гана сеҥымаш дене пӧртылыныт. А федеральный каналыште нуным ужаш – эшеат кугу куан! Кок арня ончыч нуно авашт, Татьяна Эриковна, кугу йолташышт, мурызо да гармоньчо Саша Иванов дене пырля Россий телеканалын «Андрей Малахов. Песни от всей души» кас шоушкыжо миеныт.

Серыш

Шернур районысо тӱвыра пӧрт пеленысе «Кас гармонь» ансамбль (вуйлатышыже – Саша Иванов) «Тройняшки» ансамбль дене ӱмаште Киров областьыште гармоньчо-влаклан эртаралтше «Вятские хватские» конкурсыш миен. Гармонист-влакын шоктымышт почеш Никита, Алексей да Илья куштеныт. Йыгыр рвезе-влакын  мастарлыкышт ончышо-влакымат, жюримат чотак ӧрыктарен, тушечын гран-при дене пӧртылыныт.

Изи ялыште илыше пашам йӧратыше шым йочан ешыште кушшо талантан рвезе-влакым уло тӱнялан ончыкташ шонымо амал дене 2 октябрьыште телепередачын соцсетьысе лаштыкышкыже серышым возышым да келшыше видеозаписьым, газетлаште савыкталтше материал-влакын ссылкыштым колтышым.  Возымем лудыт але уке манын, жапын-жапын эскерышым. Кок арня ончыч, 13 мартыште, вашмут толын: «Супер! Айста тугеже кум изак-шолякым Москош телепередачыш ӱжына. Нунын телефон номерыштым возен колтыза», – палдарыш Саша Иванов.

Тыгай уверлан С.Иванов моткочак куанен да йодмыштым вигак шуктен. Телепередачын редакцийже гыч тиде кастенак Татьяна Эриковна деке йыҥгыртеныт.

Ӱшанен огыл

Вучыдымо йыҥгырлан Т.Шабдарова ӱшанен огыл, вет кызытсе саманыште мошенник-шамычат чӱчкыдын йыҥгыртат, смс-ым возкалат.

Йыҥгыртыше еҥын телепередачын тӱҥ редакторжо  улмым каласымеке веле ласканрак мутланаш тӱҥальым, но тыгодым чонем вургыжын. Амалжым ойлымекыже, ӧрмем дене нимом вашештен кертын омыл, вет Саша Ивановын серышым возымыжым паленат огынал! Пелашем, эргым-влак дене мутланаш да икмыняр минутым шоналташ йодым. Келшышна, вет илышыште тыгай йӧн ала тетла огеш лий! – куанжым почо пиалан ӱдырамаш Татьяна Эриковна.

Кочкышым ямдылымым, мӱкшым ончымым…

17 мартыште Моско гыч съёмкым ышташ толшо бригадым Шабдаровмыт еш мӧҥгыштыжӧ вашлийын. Озавате Ӱярням ужатыме кечылан лач коҥгаш олтен, мелнам кӱэшташ ямдылалтын.

Кугу ешнан илышыжым тӱрлӧ шӧрын гоч ончыкташ шоненыт: рвезе-влакын торык когыльым ыштымыштым, пелашемын мелнам кӱэштмыжым, мӱкшым ончымым войзеныт. Тидлан кӧра мӱкш омартам лӱмынак лум йымач луктынна, – каласыш суртоза Сергей Анатольевич.

Проста улмыжо куандарыш

Корно, унагудо роскотым Моско гыч ӱжшӧ-влак шке ӱмбак налыныт. 19 мартыште иза-шольо Шабдаровмыт авашт дене да Саша Иванов Йошкар-Ола –Москва поезд дене элнан рӱдолашкыже кудалыныт.

Шабдаровмытын Йошкар-Олаште улмышт годым мылам Моско гыч йыҥгыртеныт да нунын дене пырля корныш тарванаш кӱштеныт. Рвезе-влак дене пырля телепередачын съёмкышкыжо каяш пиал шыргыжалмылан пеш йывыртенам. Шагат жапыште мо кӱлешым погаш кӱштеныт, да ойлымышт семынак такси дене олашке кудальым, – рашемдыш уста гармоньчо.

Москошто «Россия 1» возыман табличке дене вашлийыныт. Автомашина дене «Ханой-Москва» отельыш наҥгайышт. Ончылгоч палемдыме номерыш вераҥынна да съёмкылан шке семын ямдылалтынна. Съёмко кечын, 20 мартыште, эрдене автомашина дене Максим Горький лӱмеш киностудийыш наҥгайышт. Калык ончыко лекташ визажист, парикмахер ямдылышт, изирак репетиций эртыш. Кушто мом ойлымо, кузе лийме нерген мыланна умылтарышт. Съёмко кечывал деч вара ик шагатлан тӱҥале, – палдарыш Татьяна Эриковна. – Чонышто куан! Съёмко деч ончыч зал куткышуэм ушештарен: кажне специалист шке пашажым писын-писын шуктен. Никита, Алеша да Илья ӱстелтӧрыштӧ шинченыт, а ме – залыште, нунын шеҥгелне.

Теве гына ик каныш кечын «Песни от всей души» передачым телевизор дене онченна гын, вес арнянже тиде студийыште меат шинченна. Андрей Малахов дене вашлиймылан моткоч куаненна. Тудо проста айдеме, шке пашажым сайын палыше телевӱдышӧ. Мемнан дене мутланымыж годым мутна пуйто чытырнен, изи шӱмна кӱлткен, – ойла Никита.

Такшым тиде телепередачыште шукынжо мурат, а кум иза-шольо Саша Ивановын марий семым шоктымыж почеш аваштын шындыме «Весела каче-влак» куштымашым, а мучашлан совла дене перкален ончыктеныт.

Варажым ешна, «Тройняшки» ансамбль, еш илыш нерген каласкалаш йодыныт. Эше иктаж вес куштымашым куштен ончыкташ йодмыштлан казак тывырдыкым тавалтышна, – ешарыш Алёша.

Мемнан мӱкшотарна кокыт уло, иктыжым ачам, а весыжым ме кумытын ончена. Тидын нергенат каласкалышна да шке кӱзымӧ мӱйнам Андрей Малаховлан пӧлеклышна. Тидлан тудо пеш йывыртыш. Меат куанышна, вет ынде мемнан марий мӱйнам Москошто тамлат манын шоналтышна, – мутланымашке ушныш Илья. – Варажым ныл акаланна, чыла родо-тукымланна, туныктышына, йолташна да Марий Элыште илыше-влаклан саламым каласышна.  

Шабдаровмыт ӱстел йыр Российын тӱрлӧ регионжо гыч мийыше артист-влак дене пырля шинченыт. Съёмко жапыште да тудын деч варат кум иза-шольо шуко еҥ дене палыме лийыныт, шарнаш кодаш пырля войзалтыныт да авашт денат палдараш кумылым ончыктеныт.

Икмынярынже Йошкар-Олаште лиймышт нерген ойленыт, нунылан марий тывырдык пеш келшен, ойыртемалтшын чучын, – ойла Татьяна Эриковна. – Нунак рвезе-влаклан икте почеш вес йодышым пуэденыт. Ты мутланымашышт пеш оҥай ыле:

Кумытынат икгай улыда. Тендам кузе ойырен моштыман?

Ачай ден авай, акайна-шамыч мемнам ойырен моштат.

– Школышто урок годым огыда вашталт?

–Уке!

– Тугеже эше огыда мошто!

Съёмкышто лиймым гармонист Саша Ивановат кугу событий семын шарнаш тӱҥалеш. Ты шотышто тудо тыгерак ойлыш:

«Тройняшки» ансамбльым телепередачыште ужаш шонымем дене шкеат тушко логалмылан моткоч йывыртенам. Кызытат ӱшанаш лийдымыла, йомакыш унала миен толмыла чучеш. Съёмко деч вара Андрей Малахов дене кужун мутланаш, иктын-иктын войзалташ жап ыш лий, тушто вигак кокымшо передачым войзаш ямдылалташ тӱҥалыныт. Мемнан съёмко кум шагат шуйныш, но жап кум минутла писын эртен кайыш.

– Съёмко мучашлалтмеке, Андрей Малахов дене пырля войзалтна, эрге-шамыч кидпалыжым нальыч. Жап эртымеке, тиде пиалан татым, фотокартычкым ончалын, порын шарналташ тӱҥалына, – каласыш Т.Шабдарова.

ВДНХ-штат лийыныт

–Ты кастене ме отельыште канышна да эрлашыжым ВДНХ-се «Россий» форум-выставкым ончен савырнышна. Шуко палымым вашлийна, ятыр коллектив дене палыме лийна да Марий Элышкат унала ӱжна, – палдарыш шуко шочшан ава, 30 утла ий туныктышылан пашам ыштыше Татьяна Эриковна.

Экскурсий деч вара Андрей Малахов деке мийыше-влак мӧҥгӧ велыш шуйналтше корныш тарваненыт.

Чапле пӧлек

Йошкар-Оласе кӱртньыгорно вокзалыште нуным пиалан ача, ӱшанле пелаш Сергей Анатольевич вашлийын.

Шке миен омыл гынат, нуным ончен, йочала куаненам, вет Россий телеканалын передачышкыже логалме марте рвезе-влаклан шагал огыл мероприятийыште мастарлыкым ончыкташ, пӱжвӱдым йоктарен тыршашышт да кугу кӱкшытыш шуашышт пернен. Изинекак нуно марий тӱвыралан, йӱлалан шӱмаҥын кушкыныт, – каласыш суртоза.

Лач тидымак шотыш налын, кодшо кечылаште поро кумылым ончыктышо-влак Шабдаровмыт ешын капка ончыкыжо кандаш веран автомашинам конден шогалтеныт. Ты чапле пӧлек тӱрлӧ верыш лектын кудалышташышт эшеат сай корным почшаш.

Шабдаровмытын войзалтме телепередачым лишыл жапыште «Россия 1» каналыште ончыктышаш улыт. Тидын нерген раш уверым Вконтакте соцкылыште «Йыгыр иза-шольо Шабдаровмыт» сообществыште вераҥдаш сӧрышт.

Талантан, мастар койыш-шоктышан Шабдаровмыт еш дене кугешнаш веле кодеш. Никита, Алеша да Илья федерал каналысе передачын съёмкыштыжо лиймышт дене марий тӱвырана, койышна дене пӱтынь тӱням палдареныт.  

Алевтина БАЙКОВА

Фотом Шабдаровмыт еш архив гыч налме

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

Опубликовать в Одноклассники

Добавить комментарий