27 июнь – Колым кучымо тӱнямбал кече, манын серат интернетыште.
Колым кучаш чылт чыланжак огыт йӧрате: южыжо тидым жапым арам эртарымылан шотла але вучен шинчымыже огеш шу. А кӧжӧ колым кучен гын, тугайыштлан ты сомыл моткоч келша, вет изи кол логалеш гынат – куанже мыняре?! Адакшым яндар южышто, сылне пӱртӱсыштӧ лиймыжак уто шоныш деч кораҥаш полша. Вӱдын йыли-юли йылгыжмыжым да йыргыктен йогымыжым ончен, чоныштат ласкалык озалана.
Йолташ-влак, те колым кучаш йӧратеда? Кидышкыда эҥырым чӱчкыдынак налыда мо? Кучымо эн кугу колда могай нелытан лийын?
Марина ПОЧТЕНЕВА, Марий Элын сулло артистше:
– Колым кучаш изиэм годым кочам туныктен. Ялыштына кум пӱя уло, тушко чӱчкыдынак коштынна. Колым ондалаш манын, нӧнчыкыш ваткым ешара ыле.
Ачам дене Юл серыш тыртаганеш коштынам: мешак дене колым поген коштшым тыге маныт. Тунам вапш дене пеш шуко кол лектеш ыле!
А кызыт пелашем колым кучен пукша. Тидлан лӱмынак моторан у пушым налын. Мый Юл серыште шочын-кушшо ӱдыр улам, колым пеш йӧратем.
Андрей ЯРУКОВ, интернет-кевытын пашаеҥже:
– Колым кучаш моткоч йӧратем. Мылам колжо тунаре огыл, а пашаже утларак келша. Пӱртӱс лоҥгаш лектын, ер але эҥер воктене шинчылташ, илыш шолмо деч каналташ моткоч сай. Тидым психологий могырым шкешотан да оксам тӱлыде эртыше сеанслан шотлем.
Эн кугу колым, кум килограмман сазаным, школышто тунемме жапыште веле кученам. Кызыт эҥырым пеш шуэн кидыш налам.
Кристина ЛЕБЕДЕВА, М.Шкетан лӱмеш Марий национальный драме театрын артистше:
– Тиде паша мылам пеш келша, пелашем дене чӱчкыдынак пырля каяш тыршем. Эн кугу колым шукертак Параньга районыш мийыме годым кученам. Тунам пелашем лач кевытыш каен, а мый шкет кодынам. Тиде жапыште вӱд ӱмбалне чичка тӧрштылаш тӱҥалын, эҥырым, шӱдырен-шӱдырен, пыкше луктынам. Кугу кол логалмылан чот куаненам ыле.
Тений кол кучаш эше миен омыл, жап лийме семын уэш лекташ шонем.
Евгений КУЗНЕЦОВ, «Марий Эл» увер агентствын директоржо:
– Шкемым колызылан ом шотло, но автомашина багажникыште спининг эреак ямде. Икмыняр ий ончыч тудын дене нужголымат луктынам ыле.
Максим АЛГАЙКИН, республикысе Калык усталык да тӱвыра ден каныме паша шотышто шанче-методике рӱдерын пӧлка вуйлатышыже:
– Изиэм годым кеҥеж канышым ковам дене Волжский районысо Нурмучаш Шайра ялыште эртаренам. Тукым изам дене кажне кечын колым кучаш коштынна. Ержат лишне лийын, пакча шеҥгечын курыкым воленна да кечыгут тушто жапым веселан эртаренна.
Эн кугу колым, нужголым, шкенан дене, Морко районысо Кужер ерыште, тиде телым кученам.
А.БАЙКОВА
Авторын фотожо
