19 ноябрьыште Марий кугыжаныш университетыште Российын сулло артистше, Марий Элын калык артистше Славик Асмаевын 70 ияш лӱмгечыжлан да туныктымо пашаште 30 ий тыршымыжлан пӧлеклалтше пайрем кас эртен.
Славик Михайлович – калык куштымашын мастарже. 1975 ийыште «Марий Эл» кугыжаныш куштышо ансамбльыш пашам ышташ толын, солист гыч тӱҥалын, тӱҥ балетмейстер да художественный вуйлатыше марте кушкын. Ты коллектив дене тыршымыж годым моткоч чапле да виян проект-влакым илышыш шыҥдареныт: «Сказание земли марийской», «Марипарк», «Тӱнямбалсе калык-влакын куштымашышт». Нуным мемнан республикыштат, Россий кумдыкыштат да йот эллаштат шокшын вашлийыныт. Ансамбль дене пашам ышташ тӱҥалме жапыштак Славик Асмаев ГИТИС-ым тунемын лектын да варажым шкежат туныкташ тӱҥалын. Кызыт тудо – МарГУ-н тӱвыра да искусство кафедржын доцентше, И.С.Палантай лумеш тӱвыра да сымыктыш колледжыште кушташ туныкта, «Цармис» куштышо театрым вуйлата.
Юбилярым Кугыжаныш Погын председатель Михаил Васютин саламлен.
– Шочмо калыкшым да тӱвырам йӧратыше еҥ веле калыкын негызшым пыштыме куштымашыжым шижын да сценыште мастарын ончыктен мошта. Лач тидын дене ойыртемалтеш Славик Михайловичын усталык пашаже, – палемден марий парламент вуйлатыше. – Мый ӱшанем, марий калык куштымаш искусствым Те ончыкшымат шке мастарлыкда дене куандареда да кундемнам чапландареда.
Варажым Михаил Зиновьевич юбилярлан Кугыжаныш Погынын тауштымашан серышыжым кучыктен.
Славик Михайлович сценыш эше моткоч чолган самырык еҥ семын куржын кӱзыш да марий куштымашын семже почеш тавалтен колтыш. Ох, кузе кертеш маншыла, зал тич погынышо-влак рӱж совым перен вашлийыч.
Тӱвыра, савыктыш да калык-влакын пашашт шотышто министрын лӱмжӧ дене алмаштышыже Игорь Садовин саламлен да пайремын озажым усталык шӱлышан рвезе-ӱдыр-влакым куштымыжлан да туныктымо пашам моштен шуктымыжлан Чап кагаз дене суапландарен.
Ты кастене саламлыше-влак тӱвыра министерствын ведомствышкыже пурышо организацийла, тунемме верла гыч моткоч шукын лийыныт. МарГУ-н ректоржо Михаил Швецов саламлымаштыже изирак секретым почо:
– Славик Михайлович мыйым изиэм годсекак пала: тудын Олег эргыж дене пырля ик классыште тунемынна. Садлан нунын мӧҥгыштыштат шуко гана лийынам, пелашыжын ямдылыме тамле кочкышыжымат кочкынам, – чонжым почо Михаил Николаевич. – Славик Михайлович, Те шке пашада гоч марий тӱвырам, сымыктышым веле огыл, илышым йӧраташ туныктеда да тидын дене шукылан пример улыда. Умбакыжат таза, пиалан лийза да усталык шӱлышан ӱдыр-рвезе-влакым эшеат шуко кумда сымыктыш тӱняш лукташ тыланена.
Колледжыште туныктымо жапыште С.Асмаев латик выпускым луктын. Тунемшыже-влак кокла гыч ятырынже йоча сымыктыш школын педагогшо, куштышо коллектив вуйлатыше улыт, «Марий Эл», «Танок» кугыжаныш, «Казан» муниципальный ансамбльлаште да Москосо мюзикл театрыште куштат.
– Славик Михайлович мемнам кокымшо курсышто туныкташ тӱҥалын. Занятийна эреак сайын эртен, шкем кучымо, кузе коймо, могай лийме шотышто тудо мыланна пример лийын, вет тудо жапыште шкежат ГИТИС-ыште тунемын. Пырля тунемшына-влак кызыт Хант-Мансий автономный округышто, Португалийыште да икмыняр моло олаште пашам ыштат, – палемденыт икымше выпускын ӱдыржӧ-влак.
Моло выпускын ӱдыр-рвезыже-влакат уста туныктышыштым саламленыт да студент пагытыште ача семын ой-каҥашым пуымыжлан, шке пашам сайын палыше да пеҥгыдын йодын моштышо лиймыжлан тауштеныт, чон гыч лекше шомакла дене кумылым нӧлтеныт.
Чынжымак, Славик Михайлович тӱҥалме кеч-могай пашажым мучаш марте шукта да моштымашыж гоч калыкнан тӱвыра поянлыкшым, йӱла ойыртемжым ончыкта. Тидымак пеҥгыдемдышт сценыште мастарлыкым ончыктышо «Цармис», «Марий Эл» да моло коллектив-влак.
Вставке:
Славик Михайлович Пошкырт кундем Пӱрӧ районысо Кужнур ялеш шочын-кушкын. Ача-аважын, Михаил Иванович ден Йындалче Епалаевнан кумшо йочашт.
1961 ийыште Бахтыбаево селасе кандашияш школыш икымше классыш каен. Икымше куштымашыже 1 Май пайремлан пӧлеклалтын.
1969 ийыште Башкортостанысе культпросветучилищын студентше. Тунемын лекмеке, направлений дене Пӱрӧ олаш куштышо коллективым вуйлаташ колтеныт.
1970-1972 ийлаште армийыште лийын, Кавказ кундемысе военный округышто службым эртен.
1975 ийыште «Марий Эл» ансамбльыш толын.
1993 ий гыч И.С.Палантай лӱмеш тӱвыра да сымыктыш колледжыште туныкта.
2000 ий гыч Марий кугыжаныш университетыште тырша.
2008 ий гыч «Цармис» ансамбльым вуйлата.
Алевтина БАЙКОВА
Марий Эл Кугыжаныш Погынын
пресс-службыжын фотожо
