Кодшо кечылаште Юл кундем технологический университетыште «Келшымаш кӱвар» национальный тӱвыра фестиваль VII гана эртен.
Тиде университетыште тачысе кечылан уло Россий, лишыл да тора йот элла гыч тӱрлӧ калыкын представительже-влак тунемыт. А почылтын фестиваль «Марий Эл — тӱрлӧ калыкын келшен илыме кумдыкшо» дикуссионный площадкыште. Тудым «Волгатехын» университет комплексым вияҥдыме шотышто проректор И.Петухов почын. Тушто икмыняр йодышым каҥашеныт: республикыште национальный политике кузе вияҥ толмо гыч тӱҥалын, Российыште илыше тӱрлӧ калыкын традиционный ойыртемыштым арален кодымо йӧн-влак марте. Ты площадкыште Марий Элыште айдемын праваж шотышто уполномоченный, Россий Президент пеленсе национальность-влак кокласе кыл шотышто советын членже Лариса Яковлева, Тӱвыра, печать да калык-влакын пашашт шотышто министерствын наций да конфессий-влак кокласе кыл пӧлкан вуйлатышыже Игорь Садовин, Йошкар-Оласе депутат-влакын погынымаш вуйлатышын алмаштышыже Мария Жирова да марий вузлан представительышт лийыныт.
Национальный тӱвыра ончерышкат шукын миеныт. Руш, марий, татар, дагестан, туркмен, кыргыз, азербайджан, африкан, тыгак моло калык гыч лекше студент-влак шкеныштын национальный чиемышт, кидпашашт, сувенирышт дене палдареныт, икте-весым шке йӱла кочкышышт дене сийленыт.
Погынышо-влакым фестивальым торжественно почмо дене ПГТУ директор В.Шебашев, Марий Эл Правительстве председательын икымше алмаштышыже М.Васютин, тӱвыра, печать да калык-влакын пашашт шотышто министр К.Иванов, молодежный политике, спорт да туризм министр Л.Батюкова саламлаш миеныт. Шке шочмо верышт деч тыгай тораш тунемаш толшо студент-влаклан шке йылмыштым, йӱлаштым, тӱвыраштым арален кодаш тыланеныт.
А вара пеш оҥай концерт лийын. Тӱрлӧ калык гыч лекше студент-влак шке мастарлыкыштым ончыктеныт. Поснак оҥай ыле Чечня, Армений, Таджикистан, Конго, Индонезий гыч толшо студент-влакым ужаш. Белорус «Славяне» калык вокальный ансамбльымат шокшын вашлийыныт. Икманаш, «Келшымаш кӱвар» тушто лийше кажне еҥлан ушешыже кодшаш.
С.Носова
М.Скобелевын фотожо.