«Салика» – марий калыкын ик эн йӧратыме спектакльже. Тудым М.Шкетан лӱмеш Марий национальный драме театрын визитный картычкыжлан шотлаш лиеш. Икымше гана ты комедийым 1938 ийыште режиссёр А.И.Маюк-Егоров сценыш луктын. Тиддеч вара ятыр режиссёр шынден, да тачат ты спектакль театрын репертуарыштыже уло. А 29 ноябрьыште ты музыкальный комедийым 900-шӧ гана сценыште модын ончыктат.
Тиде амал денак кодшо арняште Марий драме театрын тоштерыштыже тӱрлӧ ийыште спектакльым шындыше режиссёр ден тушто Саликан рольжым модшо артист-влакым чумыреныт ыле.
Вашлиймаш тӱҥалтыште театрын художественный вуйлатышыже, режиссёр Василий Пектеев «Салика» могай ийлаште шындалтын да тудым сценыш лукмаште кӧмыт тыршеныт — чылажымат радамлен каласкалыш.
А варажым режиссер ден Салика-влак спектакльым шындыме да тушто рольым модмыштым порын шарналтышт.
Тӱҥ режиссёр Роман Алексеев ты спектакльым йочаж годым ужмыжым палемдыш. Тунам Саликан рольжым Валентина Васильева, а Маринаным Нина Османова модыныт.
– Постановкым оркестрын шоктымыжо сӧрастарен. Ме, йоча-влак, сылне семым куанен колыштынна, спектакльым ӧрын онченна, – шарналтыш Роман Юрьевич. – А театрыш пашаш толмеке, «Саликаште» мылам урядникын рольжым ӱшаненыт. Вара Эчукым модынам. Спектакльыште чыла рольжат оҥай, кажныжым моткоч сайын келыштарыме, сандене артист-влаклан тушто модаш – кугу пиал. Шарнем, Виктор Дмитриевич Бурлаковын воштылалын ойлымыжым: «Тиде спектакльыште могай-гына рольым модын омыл гын!? Эчан ватым веле келыштарен омыл. «Салика» тӱняштыжат лач мемнан театрыште веле ончыкталтеш. Ты спектакль – мемнан ойыртемна, тиде – мыланна, артист-влаклан, шкешотан школ. Тиде – историй, историй дене пырля тачысе илыш. Ончыкыжымат тушто мылам эше иктаж рольым ӱшанен пуат, шонем.
– Тиде спектакльым шындыме нерген шоналтенат омыл ыле. Но икана концерт программым погымо годым ужам: артист-влаклан у вургемым ышташ жап. Но тидлан окса посна ок ойыралт. Сандене «Саликам» угыч шындаш кӱлешлан шотлышым. Тиде спектакль амал дене чыла артистым чиктен шогалтышна. А спектакль вес режиссерын деч ала-мо дене ойыртемалтшаш вет. Тыге Эчукын рольжым Роман Алексеевлан пуышым, Полат Акпайым тунам эше самырык — Артём Асмаевлан. Спектакльыште эн тӱҥжылан йӧратымашым шотленам, вет кажныжын тудо уло, – каласкала Василий Домрачев. – Артист-влак сӱаныште оркестр почеш огыл, а шӱвыр, шиялтыш, тӱмыр почеш муреныт. Но тудо жаплан театрыште семӱзгар-влакым шоктен моштышо лийын огыл, сандене Александр Малининым пашаш налынна. Тудо артист-влакым шокташ туныктен.
(Умбакыже газетыште лудаш темлена)
Алевтина БАЙКОВА
Авторын фотожо