«Здравоохранений» национальный проектын «Тазалык аралтыш аланыште ик кугыжаныш увер системе негызеш здравоохраненийын единый цифровой контуржым ыштымаш» регионысо программыжым илышыш пуртымо кышкарыште Марий Элын Тазалык аралтыш министерствыже электрон документооборот негызеш ведомство-влак коклаште увер кылым сайын вияҥда.
Республикнан чыла поликлиникыж ден стационар медорганизацийыштыже медицине увер системе пашам ышта. Таче медперсоналын 6000 утла паша верыштыже келшыше техникым шындыме, увер петырыме сетьыште кия, тудым аралыме чыла йодмаш шукталтеш.
Минздрав Медико-социальный экспертизе бюро дене пеҥгыде кылым куча – медико-социальный экспертизыш 80 процент наре направлений (088/у формо) электрон документооборот гоч эрта.
– Российын регионжо-влак кокла гыч мемнан республикнам пашам ыштен кертдымым пеҥгыдемдыме электрон лаштыкым пуртымо шотышто пилот проектыш ик эн ончыч ушымо, да кызыт чыла гаяк медорганизаций тиде системе дене пайдалана, – палдара тазалык аралтыш министрын алмаштышыже Юлиана Зейтулаева. – Ме Россий Федерацийын Социальный фондшо дене азам ыштыме электрон сертификат шотыштат пашам пырля ыштена. 2022 ийыште Росгвардий дене саргуралым налаш чаракын укелыкше нерген справкым пуымо шотышто кылым ыштенна. Ончыкыжым Элкӧргӧ паша министерстве дене пырля кагаздыме документооборотым водительын удостоверенийже шотышто пурташ палемденна. Тыгак здравоохраненийыште маммографий результатым лудмо ужашыште искусственный интеллектым пурташ шонена, тидыже ӱдырамаш-шамычлан профосмотрым эртарыме годым врачын «шӧрту рак» диагнозым шындыме шотышто йоҥылыш лийын кертмыже але кокытеланымыж деч полша.
Республикыште рентген снимке-влакын ик базыштым, лабораторный увер системым ыштыме, программный продуктышо Вашкеполышым пуымо службын единый диспетчер службыжо пашам ышта. 2023 ий мучаште Йошкар-Олаште аптеке-шамыч дене льготан эмым электрон рецепт почеш пуымо кылым практикыш пурташ палемдыме.
М.ИВАНОВА
Фотом интернет гыч налме
