1 гыч 10 август да 16 гыч 26 август марте жапыште Москва гыч «Прикладной шымлымаш да программе-влак рӱдер» АНО шке кумылжо дене Марий Элыште сайлымаш деч ончыч республикыште илыше-влакын могай политический партий верч улмыштым рашемдаш кок социологий шымлымашым эртарен.
Кок шымлымашыжланат кундемнан чыла ола ден районлаштыже ик тӱжем еҥ деч йодыштыныт. Тидлан кӧм ойырен налшашым ончылгоч палемден огытыл – кушко логалын, тушко пуреныт, кӧ деч логалын, тудын деч йодыштыныт. Тыгодым ӱдырамаш але пӧръеҥ улмым да ийготым гына шотыш налыныт.
Вашештыше-влак шке шонымашыштым лӱдде ойленыт. Мутлан, южышт, 2,5-2,6 %, каласеныт: сайлымашке каят, но чоныштлан келшыше партий уке, сандене бюллетеньым локтылаш шонат. А кажне визымше еҥ кӧлан йӱкшым пуышашым эшеат раш огеш пале. Партий-влак кокла гыч еҥ-шамычлан «Единый Россий» келшыме рашемын. Тудо – эн ончылно.
Л.КАМАЛЕТДИНОВА.
