СПОРТ УВЕР ЙОГЫН

У кӱкшытлан ямдылалтыт

«Демографий» национальный проектын кышкарыштыже «Спорт – илышын нормыжо» федеральный проектым илышыш шыҥдарат. Тудын дене келшышын, спорт гимнастике дене олимпийский резерв спорт школлан 544086 теҥгеаш  оборудованийым налыныт. Ты школышто элнан сборный командыжлан ӱдыр-влакым ямдылат.

Марий Эл Молодёжный политике, спорт да туризм министерствын пресс-службыжын увертарымыж почеш, «SPIETH» гимнастический пырням, «SPIETH» Moscow 8   мостым, тӱрлӧ кӱкшытан «Gymnova» ден «SPIETH» бруслан варам, тыгак 30 килограмм магнезийым налыныт.

– Спорт гимнастике дене материально-технический базым уэмдыме, ты видым ойырышо-влаклан сай кӱкшытыш шуаш, чапле результатым ончыкташ полша, – палемденыт министерствыште.

Ты вид дене школ регионыштына ик эн ончылно кайышылан шотлалтеш. Лач тыштак Олимпийский модмашын чемпионкыжо (1968 ий, Мехико) Зинаида Воронина (Дружинина) кугу спортыш негызым пыштен. Спорт гимнастике дене школлан тудын лӱмжым пуымо. Тыштак Российын сборный командыжлан спортсмен-влакым: Алёна Пронинам, Анна Родионовам – ямдыленыт. Тылеч посна тушто СССР-ын да Российын 101 спорт мастерже, спорт мастерыш 217 кандидат кушкыныт, 10 тӱжем утла йоча гимнастикылан кумылаҥын.

Палаш: 26 октябрьыште всероссийский гимнастике кечым палемденыт.

Е.ЭШКИНИНА.

Опубликовать в Одноклассники

Добавить комментарий