Марий Элыште «Профессионалитет» федерал программе илышыш шыҥдаралтеш. Ушештарена, Юл кундем кугыжаныш технологий университетын Йошкар-Оласе аграрный колледжыштыже ялозанлык направлений дене «Агротехник» тунемме-производство рӱдерым почмо. Тудын ик эн тӱҥ задачыже-влак кокла гыч иктыже – школышто тунемше-влак дене профориентаций пашам эртарымаш.
Ты сомылым тений 1 февраль гыч колледжын студентше-влак – амбассадор-шамыч – тыршен ворандарат. Нуно арня еда тунемме верыштышт школышто тунемше-влакым вашлийыт але общеобразовательный организацийыш шкак лектын коштыт да «Профессий-влакын шоушт» презентацийым, класс шагатым да моло мероприятийым эртарат. Тыге тиде кечылаште студент-шамыч Медведево районысо Знаменский, Азаново, Юбилейный школлаште лийыныт, Йошкар-Оласе 31-ше №-ан школыш миен кошыныт. А эртыше кугарнян колледжыште Йошкар-Оласе 26-шо №-ан школын 70 наре тунемшыже вучымо уна лийыныт.
Колледжын актовый залыштыже амбассадор-влак – тӱрлӧ группылаште да курслаште тунемше куд-шым самырык еҥ – школышто тунемше-шамычым изин-кугун вученыт: выступленийыштым уэш-пачаш лудыныт, мастер-классым ончыкташ оборудованийыштым ямдыленыт. Теве йоча-влакат толын пурышт, нуным тунемме верын преподавательже, амбассодор-влакын командыштын наставникше Рания Тахировна Люшина кок тӱшкалан шеле: иктыже залеш кодо, а кокымшыжо колледжын кудывечышкыже лекте. Мый икымшыж дене пырля кодым. Амбрассадор-влак тыманмеш пашаштым тӱҥальыч. Эн ончычак нуно тунемме верышт дене палдарышт, тыште могай специальностьым налаш йӧн улмо дене кумдан палдарышт. Тидын деч вара школышто тунемше-шамычлан профориентаций дене онлайн-тестированийым эртарышт. Тушто чылаже кумло наре йодыш лийын, тудлан кажныже вашештен. Вашмутым пуымеке, кажнылан иктешлымаш-темлымаш толын. Чыла тидын деч вара амбассадор-влак «Агроинженерий» направлений дене мастер-классым ончыктеныт, тушкыжо школышто тунемше кажне ӱдыр-рвезе ушнен да шке моштымашым терген кертын.
Тиде жапыште колледжын кудывечыштыже, Рания Тахировнан вуйлатымыж почеш, йоча-влакын кокымшо тӱшкашт «Транспорт-технологий машина-влакым обслуживатлымаш» направлений дене шинчымашыштым пойдареныт. Мом ыштеныт, шонеда? Трактор дене кудалыштыныт! Мутат уке, руль воктене шкетын гына огыл лийыныт, кажныж пелен колледжыште производство туныктымаш дене мастер Александр Сергеевич Поздеев шинчен. Кудывечыш лекмем годым тудын пелен руль воктене 7-ше классыште тунемше Ханифа Кадирова лийын, удырын шинчаже йӱлен гына – оҥайын чучын витне… Кокымшо тӱшкаште утларакшым удыр-влак лийыныт гынат, нуно трактор деч лӱдын огытыл: чылан огыл гынат, шукынжо тудын дене кудалыштын онченыт. Тыштак нуно комбайн да моло ялозанлык технике дене палыме лийыныт, манмыла, ужыныт веле огыл, кученак онченыт.
Теве могай оҥай да кӱлешан пашам колледжын студентше-влак эртарат. Шкан профессийым ойырымаш – моткоч кугу да ответственный ошкыл. Ӱшанена, нине ӱдыр-рвезе-шамыч коклаште иктажше ялозанлык направлений дене специальностьым налаш кумылаҥеш да уста пашаеҥ лиеш. А колледжын студентше-влак, чынжымак, молодец улыда!
Г.Кожевникова
Авторын фотожо
