Марий Тиште кечым пайремлыме мероприятий-влак Шкетан лӱмеш кугыжаныш национальный драме театыште эртеныт. Тушко Марий Эл вуйлатыше Юрий Зайцев миен.
«Идалыкын эн сай книгаже» ончер дене палыме лийын. Тушкыжо литературно-художественный, научный, тунемме савыктыш-влакым чумырымо ыле. Тыгак МарНИИЯЛИ-н пашаеҥже Андрей Чемышев тудым марий йылме дене йӱкан полышкалышым, аудио ден видео контентым автоматически кусарыше системым ыштыме кугу паша дене палдарен. Погынышо калыкым саламлышыла Юрий Зайцев ты пашан кӱлешлыкшым палемден: «Мутат уке, тиде марий йылмым арален, тудым вияҥден колташ да илышын тӱрлӧ сферышкыже кумданрак шыҥдараш полшышаш. Йылме – тиде историйым аралыше, курымла дене чумырымо калыкын кӧргӧ чон, материальный, тӱвыра, йӱла поянлыкше».
Туштак регион вуйлатыше сӱретче Сергей Алдушкиным «Россий Федерацийын сулло сӱретчыже», поэтессе Зоя Глушковам «Марий Элын калык писательже» чап лӱм-влак дене палемден. «Кугарня» газет» кугыжаныш унитар предприятийын директоржо Эдуард Иманаевлан Марий Эл Правительствын Чап грамотыжым кучыктен.
С.Носова
