Козьмодемьянскыште причал пырдыжым чоҥышаш улыт.
Тыге пунчалыныт Марий Эл правительстве председатель А.Евстифеев да правительствын еҥже-влак. Юлын пурла серыштыже шогышо олан историйже пеш поян. Тушто шуко тошто купеч пӧрт, тӱрлӧ тоштер уло. Тӱжвал сыныштымат ончен куанет, окна сергаштак мом шога… Таклан огыл Козьмодемьянскыш кажне ийын утларак да утларак турист толын коштеш. А причал пырдыжым ыштат гын, пристаньыш утларак судно шогалын кертеш ыле.
Ты пашажым республикын 2024 ий марте социально-экономически вияҥме программыж дене келышышын ышташ палемдыме. Причалжым 2022 ий марте ыштен шуктышаш улыт. Ола администраций объектым чоҥаш кӱлмӧ окса роскотымат шотлен луктын.
Причал Юл эҥер серыште, Стрелецкий часамла шогымо кумдыкышто, лиеш. Ты сооружений кӱртньо-бетон конструкцийым ушештараш да пассажир теплоход-влаклан причал семын служитлаш тӱҥалеш. Кызытсе дебаркадер деке изирак судно-влак гына шогал кертыт, молан манаш гын кугуруакшылан технический йӧнжат уке, эҥер пундашат келге огыл. Санденак судно-влак Козьмодемьянскыш пурыде эртен каят. Тыге турист-шамычат марий оланам умбачын веле ончат.
С.НОСОВА
