Йошкар-Оласе рӱдӧ каныме паркыште Воинын чапшылан монумент воктене Кугу Сеҥымашлан 79 ий теммылан пӧлеклалтше торжественный митингым регион вуйлатыше Юрий Зайцев почын.
«Совет калыклан ты Сеҥымаш моткоч шергын шуын. Миллион дене салтак-влак волгыдо ончыкылык верч шке илышыштым пуэныт, шкенан эрыкнам, гитлер чума деч уло тӱням арален коденыт. Тылыште тыршыше-влак промышленный предприятийлаште военный ден гражданский сатум йӱдшӧ- кечыже ыштеныт, ял калык пасушто тыршен. Ик еҥ семын уло эл калык фашист агрессор ваштареш шогалын», – каласен Юрий Зайцев. Тудо сарын ветеранже, тылын труженикше-влаклан, нунын тукымыштлан мыланна эрык илышым пӧлеклымыштлан тауштен.
«Таче нацизм угыч мемнан эллан лӱдыкшым ышта. Исторический факт-влакым шояклен савыркалаш тӧчымашат уло. Но ме шкенан ачана, кочна, кугезына-влакын суапыштым аралыше тукым улына, сандене тидым ышташ огына пу», – ешарен Юрий Зайцев.
Погынышо-влакым олан мэрже Евгений Маслов, «Защитники Отечества» кугыжаныш фондын филиалжым вуйлатыше Ренат Магсумов саламленыт. Вара Кугу Отечественный сарыште вуйым пыштыше салтак-влакым ик жап шып шоген шарналтеныт. Воинын чапшылан шарныктыш, «Курымашык тул» монумент воктеке пеледышым пыштыме церемоний эртен. Кажне ийын ты кечын Йошкар-Оласе Марково шӱгарласе иза-шольо шӱгарышкат пеледышым пыштат.
Д.Речкинын фотожо/Марий Эл вуйлатышын пресс-службыжо
