Йошкар-Ола мучко бронзо гыч ыштыме шым тӱрлӧ пырысиге скульптурым вераҥдат.
Каласен кодыман, пырыс-влак кажныже икте-весышт деч ойыртемалтыт, вургемыштат тӱрлӧ. Кажныжлан лӱмымат пуэныт: Россий сбербанкын тӱҥ офисше ончылно вераҥдымыже – Карл, тудо оксам куча; Историй тоштер ончылно шогышо Василий котомкам сакалтен; кӱртньыгорно вокзал воктеке шогалтыме Дымкан кидыштыже – изи чемодан; Благовещенский башне ончылно улшо Мурзик гитарым шокта; Патриарший площадьысе Барсик колым йӧрата; Рӱдӧ тӱвыра да каныме паркысе Ириска мороженныйым кочкеш; Э. Сапаев лӱмеш опер да балет кугыжаныш театр ончылсо Бусинкан йолышкыжо пуантым чиктат. Фигурко-влак чылан 20 сантиметр кӱкшытан да латунь гыч велыме улыт.
Пырыс дене кылдалтше проектым Россий Сбербанк, Марий Элын креативный индустрий школжо да Йошкар-Ола историй тоштер Йошкар-Ола администрацийын полшымыж дене илышыш шыҥдарат. Мо оҥайже, проект оза-влакын палемдымышт почеш, нине пырыс-влакым йолын ончал савырнаш шагат наре жап кая. 2ГИС ссылке полшымо дене кажне пырыс деке маршрутым ужаш да нунын нерген сайрак пален налаш лиеш.
С.Носова
Снимкыште: Мурзик
Фотом Йошкар-Ола администрацийын лаштыкше гыч налме.
