Икыт! Кокыт! Кумыт!

У ий кож, волгалт!

 Рушарнян, 24 декабрьыште, Йошкар-Оласе В.И.Ленин лӱмеш рӱдӧ площадьыште У ий ёлкым торжественно почыч.Кас велеш площадьыште эртаралтше «Мотор теле мемнан деке унала толын» пайремышке ача-авашт, коча-ковашт дене пырля йоча-шамыч шукын погынышт. Нуным йомакысе Корак, Тигр, Сур пире, шушаш идалыкын озаже Дракоша модыктышт, куштыктышт. Тӱвыра да каныш рӱдӧ паркын пашаеҥже-влакын ямдылыме «Йомакысе чодыраште Дракошан путешествийже» театрализованный представлений чылалан моткоч келшыш.

– Икыт! Кокыт! Кумыт!

У ий кож, волгалт! – йоҥгалте торашке.

Йӱштӧ кугыза да Лумӱдыр дене пырля кум гана тыге кычкырымек, мотор кож тӱрлӧ тӱс дене волгалте. Пайремыш погынышо калыкым Йошкар-Ола мэрын алмаштышыже Антон Пугачёв саламлыш:

– Площадьым сӧрастарыме, кож чӱкталтын, тугеже У ийым вучена. Чаманаш логалеш, кызытеш катокна шулен, йӱштӧ шке вийже дене уэш кылмыкта гын, коньки дене адакат мунчалташ лиеш.

Ондакысе ийла семын ий скульптур да монь уке манын шылталыше-влак улыт гынат, нимом от ыште. Игече деч кугу от лий. Чынак, каток кугу ерыш савырнен, ий Мераҥын пылышыже шулен… Туге гынат йырваш йыли-юли йӱлышӧ гирляндым, моло инсталляцийым ужмек, юзо У ийын лишеммыжым шижат.

Каласена, площадьысе У ий пайрем Марий Эл вуйлатыше Юрий Зайцевын темлымыж почеш увертарыме «Марий теле» проект дене келшышын эртыш.

Л.СЕМЕНОВА

М.Скобелевын фотожо