ЙОШКАР-ОЛА УВЕР ЙОГЫН

Йошкар-Ола уремым 70 спецтехнике эрыкта

 

Эскереда, мынярымше кече лум лумеш: кунамже киса кайык вуй гае, кунамже шокте гоч колтымо гае, а таче чотак опта. Специалист-влакын ойлымышт почеш, Йошкар-Олаште 10 январьлан ик тылзаш нормын 70%-ше лум возын.  Тачыже поран талышнен, тидыже коммунал службын пашажым эшеат нелемда.

Йошкар-Олан илыме фондшым обслуживатлыше оргнизаций-влак ола уремлам да кудывечылам эрыкташ теҥгече 50 утла спецтехникым луктыныт. Суткаште 5 тӱжем тонн кубометр лумым ола деч ӧрдыжкӧ шупшыктымо. Корнышто яклештме деч шаваш 148 тонн материалым ямдылыме, 28 тонным тротуарыш шаваш тӱҥалыт. Дворник-влакат яра огыт шинче: мутлан, 517 дворник кидвий дене лумым кышкен. Таче, 11 январьыште, ола уремым 70 наре технике эрыктен.

Ушештарена, Марий Эл вуйлатыше Александр Евстифеевын кӱштымыж почеш 11 январь гыч ТСЖ, ЖСК да ТСН, тыгак управляющий компаний-влаклан ола кумдык гыч шупшыктымо лумым утилизироватлаш талон-влак яра пуалтыт.

Йошкар-Ола мэрын икымше алмаштышыже Антон Трудинов шуко пачеран пӧрт-влакым обслуживатлыше организаций-влак деке ӱжмаш дене лектын: пӧртла йыр лумым эрыктыме, лумым свалкыш шупшыктымо пашам кӱлеш семын виктарен колташ.

Интернетыште тӱрлӧ шонымашым возкалат: коммунал службым кӧ вурса, кӧ таум ойла. Мом ыштет, айдемылан пӱртӱс вий ваштареш шогаш куштылгыжак огыл. Но тыгодымак ме чыланат кажныже кеч шкенан илыме пӧрт ончылнына лумым куэна гын, тидат полыш лиеш…

Л.СЕМЕНОВА ямдылен

Фотом Йошкар-Ола администрацийын сайтше гыч налме

Опубликовать в Одноклассники

Добавить комментарий