16-17 августышто Йошкар-Олаште « Йошка Еш» регион-влак кокласе III гастрономий фестиваль эрташ тӱҥалеш.
Тений Медведево ипподром пеленысе кумдыкым ойырен налме. Участник-влаклан ончылгоч кочкышым ямдылыме темым увертарыме: «Вож-влак да под». Икманаш, элыштына илыше калык-влакын кочкышыштым пӱртӱсым, мландым пагалымаш гоч ончыкташ кӱлеш.
Фестивальыш Марий Элын веле огыл, элнан тӱрлӧ лукыштыжо илыше ресторатор семын пашам ворандарыше-влак ушнат. Кызытеш Камчатка, Мурманск, Карелий, Хакасий, Башкортостан, Коми, Удмуртий, Моско кундемла гыч толаш сӧреныт.
Фестиваль годым лӱмым налше шеф-повар-влакын авторский кочкышыштым авызлаш, нунын деч мастарлыклан тунемаш йӧн лиеш. Кочкышым ямдылыме дене пырля кидпашалан туныктымо мастер-класс-влак эрташ тӱҥалыт. Организатор-влак тулото воктене этно-шоумат ончыкташ сӧрат. Тӱрлӧ конкурс, модыш, концерт пайрем кумылым нӧлташ полшат.
Снимкыште: кодшо ийысе фестивальыште «Мари» сийгудын пашаеҥже-влак команмелнам уремыштак кӱештыныт.
Светлана Носован фотожо.
