Марий Элын сулло журналистше, С.Г.Чавайн лӱмеш Кугыжаныш премийын лауреатше, драматург, прозаик да поэт Александр Петровлан 55 ий темме лӱмеш 3 июньышто С.Г.Чавайн лӱмеш национальный книгагудышто усталык касше эртаралте. Тудо «Возыде мый ом керт иленжат» маналтын.
Пайрем касыш ятыр лӱмлӧ еҥ ден уна-влак толыныт ыле. Кажныже сцене гыч юбилярым саламлыш да пӧлекым кучыктыш. Тиде – Марий Элын тӱвыра, савыктыш да калык-влакын пашашт шотышто министрын алмаштышыже Михаил Матвеев, «Марий Эл» газетын тӱҥ редакторжо Александр Абдулов, Марий самырык театрын художественный вуйлатышыже Олег Иркабаев, Россий Писатель ушемын Марий Элысе пӧлкажын вуйлатышыже Светлана Архипова, кумдан палыме сӱретче Иван Ямбердов, «Кугарня» ден «Ямде лий» газет-влакым лукшо предприятийын директоржо Эдуард Иманаев, «Ончыко» журналын тӱҥ редакторжо Игорь Попов. Тыгак родыжо, лишыл еҥже, пырля тунемшыже, йолташыже, моло саламлаш толыныт ыле. Да кӧ могай-гына пӧлекым конден огыл?! Мутлан, Параньга район Яҥгетсола ялысе тӱвыра пӧрт вуйлатыше Эльвира Захарова эсогыл тичмаш мелна кышыл, туара да салмамуно дене толын ыле!
Усталык кас кум шагат шуйныш. Тиде жапыште юбиляр нерген посна блок дене ужашын-ужашын палдарышт. Эн ончычак Александр Алексеевичын йоча жапше, вара кушто тунеммыже, фермер лиймыже, журналист пашашке кузе толмыжо, паша корныжо, шындалтше спектакль, савыкталт лекше книгаже-влак нерген тӱҥ шотышто шкеже каласкалыш, икмыняр почеламутшо кузе да кушто возалтмыж нерген ойлыш. Мутлан, Турцийыште канымыж годым, самолётышто чоҥештымыж жапыште, малаш вочмекше почеламут корно-влак кузе толаш тӱҥалме нерген каласкалыш. Тыгак фотографий-влакым, тудын нерген телевиденийын тӱрлӧ ийлаште сниматлыме видеосюжетлам ончыктымат тидым ышташ полшышт. Тудын мутшылан возымо муро-влакат сцене гыч йоҥгалтыч. Такшым поэтын ятыр почеламутшо мурыш савырнен. Ты гана касым Лариса Сидоркина ден Сергей Мамаев сӧрастарышт.
Тиде мероприятийыштак ожсо кечынже гына лекше «Пустаҥше ял» поэтический сборникшын презентацийже лие. Кузе ойлат, эше свежа чия дене ӱпшалтше у книга нерген ятыр поро мутым лӱмлӧ поэтессе Альбертина Иванова ойлыш.
Усталык кас моткочак тыматлын, моторын эртыш. Нимогай официоз манме деч посна, простан, веселан. Шижалте: тушко пайрем озан чынжымак эн лишыл еҥже ден йолташыже-влак гына чумыргеныт. Санденак Александр Алексеевич чӱчкыдынак мыскарамат ыштыш, илышыж гыч оҥай историй ден томаша-влакымат кумылын каласкалыш. Арам огыл вараже погынышо-влак кокла гыч чылан гаяк тиде касыште тудын нерген ятыр уым пален налмыштым палемдышт.
Чыным ойлаш гын, эсогыл мыят икмынярже нерген лач ты касыште веле пален нальым! Мутлан, классшын, вара Кугу Лаждӱр школын, а умбакыже уло Кужэҥер районлан юнармеец-влакын парадыштышт отрядын эн сай командирже лӱм дене палемдалтмыж нерген тиде кас марте колын омыл. Тыгак офицер лияш ямдылалтмыж нергенат тымарте пален омыл ыле. Мыйже тунам изирак лийынам да сандене палыде кодынам докан, вет изамже шке сеҥымашыж нерген, манмыла, кажне лукышто моктанен коштын огылыс!
Иктешлен каласаш гын, тыгай сынан усталык касым эртарымын кӱлешлыкше кугу. Тушто тиде я тудо уста айдеме нерген, усталыкышт нергенат шагал огыл уым пален налат да тӱняумылымашетат пойдаралтеш.
Любовь Камалетдинова
Э.Монахован фотожо
