ЛӰМГЕЧЕ

Кужу ӱмырын негызше – поро кумыл

10 декабрьыште Кугу Отечественный сарын ветеранже Зоя Васильевна Курбатова 101 ияш лийын!
Лӱмгече оза 1919 ийыште Киров область Санчурск район Сметанино селаште шочын. Кресаньык ешыште шуко икшыве кушкын: 5 эрге да 6 ӱдыр.
Черке-приход школын 4 классшым тунем пытарымек, ӱдыр «У илыш» колхозышто пашам ышташ тӱҥалын. 1942 ийыште Сталинград кредалмашын участникше, сусыргымылан кӧра армий гыч комиссоватлыме Анатолий Андреевич Курбатовлан марлан лектын.
Зоя Курбатова сар жапыштат, сар деч варат шуко ий чодырам эҥер дене волтымаште пашам ыштен. Пелашыже врач-ветеринар лийын.
1970 ийыште вате-марий Курбатовмыт Йошкар-Олашке илаш кусненыт. Тылеч вара ӱдырамашын илышыже торговльо дене кылдалтын. Сулен налме канышыш лекмекыжат, йӧратыме пашаштыже эше кужу жап тыршен.
Ош тӱняште курым утла илыше Зоя Васильевна шкенжым эше пеш моторын куча, тӱнямбалысе чыла гаяк уверым пала, уналан моткоч куана.
Илалше ӱдырамашым меат шочмо кечыж дене саламлена да пеҥгыде тазалыкым тыланена.

М.ИВАНОВА

Опубликовать в Одноклассники

Добавить комментарий