Марий Элнам тӱрлӧ вере чапландарыше, марий калыкын йӧратыме «Марий памаш» ансамбльышке тӱрлӧ ийласе участникше-влак шке вуйлатышыштым, Н.П.Дружинина-Кузнецовам, шарналтат. Тений 1 февральыште тудын шочмыжлан 100 ий темын.
Лариса ШАБДАРОВА:
– Туныктышо семын Надежда Прокопьевна моткоч ушан, коллективым пагалыше лийын да мемнан деч пеҥгыдын йодын. Тудо кажне куштымашын кажне савыртышыжым, кажне тарванылмым умылтарен. Балетмейстер семын куштымаш могай характеран лийшашым ойлен. Айдеме семын гын, тудо мыланем кокымшо ава гай, вет мый ансамбльыш моткоч самырык толынам, Надежда Прокопьевналан кӧрак куштымашым туге йӧратен шынденам, 40 ий наре тачат сценышке куанен лектам.
1989 ийыште тудо черланыш, мый тудын деке эмлымверыш коштынам. Икана ойла: «Мый эше 4 танцым шындынем». Тунам неле жап ыле. Мый культур министр Виктор Николаев дек йодмаш дене миенам: «Надежда Прокопьевнан нине куштымашыштым «танцевальный йылме» дене возен кодыза. Тендан вет йӧнда уло». Но паша ыш тарване. Ныл куштымаш йомо!
Шӱгарышкыже мийымем годым мутланен шинчем да кажне гана сӧрвалем: «Кеч иктаж-кӧн омешыже кончо. Кеч Мария Лазаревналан («Марий памаш» ансамбльын кызытсе хореографше М.Л.Соловьева – ред.) нине куштымаш-шамычетым куштен ончыкто…»
Надежда Прокопьевнан ӱдыржат, уныкажат тудын корныжым тошкеныт.
Иван ИВАНОВ:
– Ончыкылык пелашем, Галина Васильевна, Юрино районысо культур отдел гыч Марий калык усталык рӱдерыш куснымекше, тӱҥалтыште методистлан, вара калык творчестве отдел вуйлатышылан ыштен. «Марий памаш» ансамбльын концертшым чӱчкыдын вӱден. А мый балалайкым, гармоньым шоктенам, вараракше Борис Шамшиев дене шиялтышым шоктенна. Удмуртийыш мийымына годым коклаштына тул ылыжмым Надежда Прокопьевна шижын шуктен, векат. «Ушнеда гын, сай мужыр лийыда», – манын, мыланемат да Галиналанат ик гана веле огыл ойлен. Мыйжым тидлан кӧрак ала-мо кажне номерыш пурташ тӧча ыле. Алгаштарен керте! Жап шумек, ойла: айста образцово-показательный сӱаным ыштена. Чылт марий сӱаным! Москва гыч РСФСР культур министерстве гыч Курбатова фамилиян специалистым ӱжыныт, ансамбль сӱан куштымашым лоҥын… А такшым «Марий памашыште» мыняр еш погынен!
Мужыраҥмеке, ме тудын деке унала чӱчкыдын коштынна. Иктым чаманем: печке дене куштымаште рольыш пурен кертын омыл. Тунам самырык лийынам, Надежда Прокопьевнан ӱшанжым сулен омыл манын, тачат чаманен илем.
Галина БЕЛЯЕВА:
– Э-э могай мыскараче ыле. Икана гастрольышто рвезе-влакын пӧлемышкышт пурен шогальым – тушто шинча. «Надежда Прокопьевна, теже тыште мом ыштеда?» – йодам.
– Карт дене модам. Тый модат? Давай, шич, модына.
Мыскараче да пеш проста ыле.
Л.СЕМЕНОВА
