Республикысе медикна-влак Запорожский область Куйбышев муниципал округысо коллегыштлан угыч полшаш ямде улыт.
Запорожский областьын Тазалык аралтыш министерствыже йодмашым ышта гын, Марий Элын Тазалык аралтыш министерствыже медик-влакын бригадыштым теният Куйбышев муниципал округысо коллегыштлан полшаш колта.
Марий Элын медикше-влак тиде кундемыш кок ий почела коштыныт. Ӱмаште шыжым командировко дене мийымышт годым Медведево районысо рӱдӧ больницын Краснооктябрьский врачебный амбулаторийжын врач-терапевтше Дмитрий Лебедев (снимкыште) ден Параньга районысо рӱдӧ больницын фельдшерже Жанна Даутова Розовка посёлкысо эмлымверыште 200 утла пациентын тазалыкшым тергеныт.
Палемдыме медосмотр келгыш кайыше ятыр черым, ты шотыштак сакыр диабетым, шӱмын ишемий чержым, гипертонийым, йыжыҥысе артрозым, рашемдаш йӧным ыштен. Медик-влак тыгак диагноз негызеш эмлалтме йӧным темленыт.
Маргарита ИВАНОВА
Авторын фотожо/ «Марий Эл» увер агентстве