Республикыштына пожар-утарыше подразделенийын еҥже-влак коклаште профессиональный мастарлык конкурс ий еда эртаралтеш. Тушто сеҥыше-влакым кум номинаций дене ойырат, тиде – «Караулын сай начальникше», «Сай пожарный» да «Пожар охранын сай пашаеҥже».
Тений пожар охранын сай пашаеҥже семын ынде кокымшо гана Звенигово район гыч Артём Иванов палемдалтын.Тудо Звенигово оласе 40-ше №-ан пожар-утарыше частьыште 2012 ий гыч пашам ышта. Ончыч пожарный лийын, а пытартыш кок ий отделенийын командиржылан тырша.
Айдемылан изинек полшаш кумылан рвезе спорт дене пеҥгыде кылым куча, ведомствын тӱрлӧ мероприятийыштыже чолган участвоватла, колым кучаш, сонарыш кошташ йӧрата.
М.ИВАНОВА.
