Медведево районысо Руэм посёлкысо «Родничок» йочасадыште йоча-влаклан агролабораторий почылтын.
Тиде проектын тӱҥ шонымашыже – мемнан икшыве-шамычым республикысе экономикын ик эн тӱҥ отрасльже дене палдарымаш.
«Ме эше тӱҥалтыш ошкылым гына ыштенна, но шонымаш шуко. Мемнан фитолампе, пробирке-влак, эсогыл самырык шымлызе-шамычлан вургем улыт. Агролабораторийыште йоча-влаклан занятийым эртараш гына огыл, тыгак шкежат тунемаш тӱҥалына», – ойла йочасадын заведующийже Светлана Зенина.
Тысе педагог-влак у кумдыкышто пашам ышташ тунем лектыныт. Агролабораторий нунылан у образовательный программым ямдылаш да илышыш пурташ йӧным ышта.
Г.Кожевникова
Фотом Марий Эл Образований да науко министерствын соцкылысе лаштыкше гыч налме.
