5 декабрьыште волонтёр-влакын кечышт эртен кайыш. Ты пайрем дене пайдаланен, тендам шке кумылын поро пашам шуктышо, тӱрлӧ мероприятийыш чолган ушнышо, республик вуйлатышын ойырымо стипендийжым налше ӱдыр Ульяна ЯМБАРЦЕВА дене палымым ыштем. Тудо Марий Турек район Яшмет ялыште шочын-кушкын. Кызыт Марий кугыжаныш университетыште нылымше курсышто тунемеш. Ончыкылык физкультур да ОБЖ туныктышо.
– Ты специальностьым ойырен налаш мо таратен?
– Школышто тунеммем годым шкемым спортын тӱрлӧ шӧрыныштыжӧ тергенам: ориентированийыште, баскетбол ден волейбол модмашкат, «Звезда» клубышкат, военно-патриот клубышто, физкультур дене олимпиадышке, «Зарница Поволжья» таҥасымашке коштынам. Спорт туризм дене кокымшо разрядем уло. Чыла тиде мылам моткоч келшен.
Эшежым ача-авам туныктышо улыт. Тидат школ пашаеҥ лияш шӱкалтышым ыштен шонем. Но ончыкыжым шинчымашым вес аланыштат налаш кумыл уло.
– Шукерте огыл МарГУ-н 12 студентше да 5 аспирантше Марий Эл вуйлатышын ойырымо стипендийжым налыныт. Тыят нунын радамыште улат.
– Тыгай стипендийым 2020-2021 тунемме ийыште 50 процент «отлично» отметкым налше, тунеммаште, шанче пашаште кугу кӱкшытыш шушо, республик, Россий, да тӱнямбал олимпиаде ден тӱрлӧ конкурслаште шкем сайын ончыктышо-влаклан пуэныт.
Мыят вараш кодын омыл. Шанче пашам-влак «Самырык шымлызе», «Студент науко да XXI курым», «Таза инициативе», «Финн-угор калык-влак поянлык» сборник ден журналлаште савыкталтыныт. Тушто мый марий калык тӱвырам, шочмо кундемын этнографийжым, таза илыш-йӱлам шымленам.
Россий да тӱнямбал конкурслаштат сеҥымашем улыт. Мутлан, финн-угор калык-влак кокласе ик форумышто кумшо вер дене палемденыт. Тунам мый икымше марий гимнын авторжо Тихон Ефремов нерген докладым ямдыленам ыле.
Чолга лияш мыйым йоча годсек туныктеныт. Ешна дене марий тӱвыра дене кылдалтше шагал огыл конкурслашке ушненна, сценыште шуко лийынна. Мыйын ача-авам пеш поро улыт. Нуно кеч-кунамат полшаш ямде улыт да мыйын виемлан моткоч ӱшанат. Мый тидлан нуным моткоч тауштем.
– Тыгак волонтёр улат манын палемдышыч.
– Тыге. Мылам еҥлан полшаш моткоч келша. А нунын таумутым ойлымышт да ваштареш порын шыргыжалмышт деч шерге, очыни, нимат уке. Кажныже доброволец лийын кертеш. Еҥ-влак вашла умылаш, полшаш тӱҥалыт гын, илышнат волгыдырак, порырак лиеш.
– Ульяна, тый шке уш-акылет, виет шагал огыл мероприятийыште тергенат. Могайже поснак шарнымашеш кодын?
– Питерыште эртыше «Ладога» ден Казаньысе Студент клуб кокласе национал лиге слёт мондалтдыме улыт. Тушто мый шуко уым пален налынам да у йолташ-влакым верештынам. Тыгак начар тазалыкан-влаклан III кеҥежысе спартакиадыште волонтёр лийме ушеш возын. Неле ситуацийыш логалше-влак пеш тале улыт. Нуно ойгырен огыт шинче, тӱрлӧ аланыште вияҥыт. Тидыже мылам ончыкыжым тыршаш да шуко пашам ышташ вийым пуэн.
– Яра жапет кузе эртрет?
– Тудыжо мыйын пеш шагал. Нимат ыштыде канен шинчен йӧршын ом мошто. Тидлан южгунам шкемым вурсем. Шукыж годым книгам лудам, тӱрлӧ курслаште шинчымашем нӧлтем. Мутлан, ик тунеммаш курсым «Россия – страна возможностей» платформо эртара.
Каныш кечылаште ялыш ача-ава деке кудалыштам. Йолташем-влакланат жапым ойыраш тыршем.
– Лудшо-влаклан темлымашет могай лиеш?
– Эре ик верыште ида шинче. «Зона комфорта» манме кумдык гыч лекса. Лач тунам, иктажым уым ыштен ончен, те келшыше сомылым муын кертыда. Тыгак шкендам весе дене ида таҥастаре. Те еҥ деч ойыртемалтше огыл, а теҥгечысе шкенда деч сайрак лийшаш улыда.
– Тау, Ончыкылык корнет волгыдо лийже.
– Тау!
О.МОШКИНА мутланен
