Уста айдеме чыла могырымат уста манын, арам огыт ойло. Тачысе лаштыкнан унаже шке мастарлыкшым тӱрлӧ могырымат терга. Мура, семӱзгар дене шокта, сӱретла, сылнымут дене кылым куча. Мутем Шернур район Шӱдымарий ял гыч Виктория ПОПОВА нерген.
– Вика, чолга койышет йоча годымак палдырнен, очыни. Садлан Калыкле президент школ-интернатыш тунемаш колтеныт.
– Тыге. Чылт артист лийынам маныт. Мураш, кушташ, сценыште выступатлаш моткоч йӧратенам. Концертлашке йоча садыш коштмекак ушнаш тӱҥалынам. Шӱдымарий школышто тунеммем годым ик мероприятийымат коден омыл, шонем. Ты жапыштак поэзий денат кылым кучаш тӱҥалынам. Лудаш йӧратымем шке возен ончашат таратен.
Нылымше классыште авам президент школ нерген каласкалыш. Тушко талантан йоча-влакым погат да семӱзгар дене шокташ туныкташ тӱҥалыт манын палдарен. Тушко каяш мый кумылаҥынам.
Авам дене пырля ты школыш икымше гана моштымемым ончыкташ миен коштмым кызытат шарнем. Эх, кузе мый тыршен муренам, куштенам, почеламутым лудынам. Ик коридор мучаш гыч весыш йоҥгалтын, очыни. Тыге музык отделенийыш пураш экзаменым кученам.
Тушко изи огыл портфолио дене миенам: таумутшо, чап кагазше – тич. Тидым ужын, верысе фельдшер художественный отделенийышкат йодмашым пуаш темлен. Тыгак ыштыме. Арня гыч тунемме тӧнеж гыч кок серыш толын: кок вережат налыныт.
Шоныде, музык отделенийым ойырен налынам. Тыге профессионал усталык корнем тӱҥалын.
– Умбакыже шинчымашым кушто шуенат?
– Тӱвыра да сымыктыш колледжын Академический музык факультетышкыже тунемаш пуренам. Ты жап пеш веселан эртен. Лач тунам туныктышо лияш шонен пыштенам. Мыйын туныктышем Валентина Виноградова тыге манын: «Педагог лияш – педагогак шочман. Вика, мый тылат ӱшанем, тый ты профессийыште шке верет муат». Тиде каҥаш умбакыжым мылам пеш полшен.
– Кызыт кок вере туныктышылан тыршет. Ноялтеш?
– Уке. «Лира» йоча сымыктыш школышто домр, балалайке, гитар, укулел семӱзгарла дене шокташ туныктем. Тыгак Андре Мальро лӱмеш 26 №-ан англо-француз гимназийыште музык урокым вӱдем.
Колледжыште урокым индивидуально эртараш туныктеныт. А тыште уло класс дене пашам ыштыман. Тидыже мылам моткоч келша. Палымым, моштымым весылан туныктен, каласен кодаш – моткоч кугу пиал. Йоча-влакын урокыш куанен коштмышт, тӱткын колыштмышт пеш шерге. Ты годым шке верыштем улмым шижам. Арам огыл ты профессийым ойырен налынам шонем.
Тиде паша мылам вийым пуа, куаным конда. Сандене пиалан айдеме улам манын, пеҥгыдын каласен кертам.
– Пиалан улам манметшым муро денат пеҥгыдемденат. Вет шукерте огыл лекше усталык саскатат тыге маналтеш. Кузе тудо возалтын?
– Мураш эре йӧратенам, но профессионал семын огыл. «Кызыт огыл гын, кунам?» йодышым шканем пуэн, студийыш кошташ тӱҥалынам.
Пиал нерген мурым возаш шонымаш ушыштем кужун илен. Ик кечын, лаштыкым налын, ты пашалан пижынам. Йолташ ӱдырем Наташа Секретарёва почеламутым сера. Ик пашажым ончычак ончыктен ыле. Тудо мылам пеш келшен да кучылташ йодынам. Тыге муро лекте – ик куплет мыйын, весе – Наташан. Семым гитар дене келыштаренам.
«Пиалан улам» муро лекмеке, шуко поро мутым колынам. Палыдыме еҥ-влакат серышым возат, вашлиймеке, мутланаш шогалыт. Тидыже умбакыжымат тыршаш кумылаҥда, вийым пуа. Кажне колыштшемлан кугу таум каласем.
– Тый шуко конкурсышто усталыкет тергенат. Ик эн шарнымашеш кодшыж дене палдаре.
– Таче кече марте кум кугу портфолио погынен: школ ден студент годсо да туныктымо пагытысе. Грамот-влак тӱрлӧ кӱкшытан мероприятий гыч улыт – район гыч тӱҥалын тӱнямбалсе марте. Семӱзгар дене шоктымо, сӱретлыме, почеламутым лудмо дене чӱчкыдын ончыл верыш лектынам. Спорт таҥасымашкат ушненам. Чылажат шерге.
Сӱретлыме дене таҥасымаш кокла гыч Германийыште эртыше «Йоча-влак руш тӱням сӱретлат» IV тӱнямбал конкурсым палемден кертам. Тушко 13 ияш лиймем годым интернет гоч ушненам. Организатор-влаклан келшен да сӱретем колташ йодыныт. Тыге мыйын пашам Германийысе ончерыште вераҥденыт ыле.
Конкурслашке ушнымо мылам кугу опытым пуэн. Кызыт тунемшем-влакым ямдылыме годым могай ой-каҥашым пуаш, кузе шкем кучышашым, кузе кумылаҥдышашым палем.
– Виктория, ончыкылык корнет волгыдо лийже.
– Тау!
О.МОШКИНА
