Шорыкйол тылзын ик мотор кечынже иканаште кок пайрем – Татьяна лӱмым нумалше-влакын кечышт да Россий Студент кече. Тугеже Таня-влакым веле огыл, а вузлаште шинчымашым нӧлтышӧ-влакым шокшын саламлена да ик чолга ӱдыржӧ дене палыме лияш темлена. Тиде Провой кундем Ӱлыл Памъял ялыште шочын-кушшо Татьяна Батаева.
– Йочалан лӱмым ойырымо годым кугурак-влакын темлымашыштым, моторын йоҥгымо да моло амалымат шотыш налыт. Ача-аватым тыге лӱмдаш мо таратен?
– 24 январьыште Татьяна-влакын кечышт деч ончыч шочынам. Ака-шӱжарем-влак тыглай огыл лӱман улыт: Аделина, Эвелина, Магдалина. Мыйын гына проста. Садлан ончыч келшен огыл. Вес могырым ончалаш гын, ик кечын шочмо кечым, эрлашыжым Татьяна кечым пайремлем, тидыже вара сай огыл мо? Тыге лӱмемым йӧраташ тӱҥалынам.
– Вконтакте социал лаштыкет ончалмеке, вигак коеш: сӱретче улат.
– Мо шкемым шарнем, кагаз ден карандаш эре кидыште улыт.
Верысе школышто нылымше классым тунем пытарымеке, авам Йошкар-Олаш, Национальный президент сымыктыш школыш, колтен. Тушто художественный отделенийым тунем лектым. Оласе художественный училище деч вара Звенигово район Кужмара йоча сымыктыш школыш туныктышылан пашам ышташ пуренам. Кызытат туштак тыршем.
Йоча-влак дене пашам ышташ – пиал. Нунын пелен усталык шӱлыш ылыжеш, умбакыжат тунемаш кумыл ешаралтеш.
Утларакше портретым сӱретлем, южгунам книгалан иллюстрацийым ыштем.
– 2018 ийыште Россий писатель ушемын еҥже Елена Андреяновна Юнусован «Кугезе калькулятор» книгажым сӧрастаренат. Тиде опытет дене палдаре.
– Нылымше курсышто тунеммем годым Елена Андреяновна мылам телефон дене йыҥгыртен да вашлияш темлен. Тунам тудо шке книгажым ончыктен да сӧрастараш йодын. Тӱҥалаш лӱдыкшӧ ыле, но ӱшанен пуэныт гын, шеҥгек чакнаш ок лий. Елена Андреяновна дене икмыняр гана вашлийын можым да кузежым рашемденна. Кок тылзе жапыште книга ямде лийын. Тыгай пашам икымше гана ыштенам, пеш келшен.
«Кугезе калькулятор» сай произведений. Лудаш темлем.
– Ме тый денет «Ӱдырсий» конкурсышто палыме лийынна. Мо дене тиде мероприятий шарнымашеш кодын?
– 2019 ийыште ялысе клуб директор ты конкурсышто мастарлыкем терген ончаш темлен. Кугу сценыште тылеч ончыч ик ганат лийын омыл ыле.
Ӱдыр-влакын тӱрлӧ йӱла дене палдарымышт поснак шерге.
– Студент пагыт эн весела манме ой дене келшет?
– Келшем. Тиде радамыш шукерте огыл ушненам. 2020 ийыште Марий кугыжаныш университетын Калыкле тӱвыра да тӱвыра кокласе коммуникаций институтышкыжо тунемаш пуренам. Декоративно-прикладной сымыктыш студийын вуйлатышыже лияш ямдылалтам. Студент жап – илышын ик эн весела ужашыже. Лач тунам ме сай йолташ-влакым вашлийына да ончыкылык илышланна негызым пыштена.
25 январьым кеч Тачана, кеч Студент кече манза, тудо садак чонышто усталык тулым аралыше, шинчымашым нӧлташ тыршыше, у деч уым кычалше самырык еҥын пайремже.
– Пайрем дене, Таня. Ончыкылык корнет волгыдо лийже.
– Тау.
О.МОШКИНА
