21-25 январьыште Чуваш кугыжаныш университетыште «Юл кундемын Татьянаже -2015» регион-влак кокласе конкурс эрта. Марий Элын чапшым тушто Марий кугыжаныш университетын юридический факультетшын 3-шо курсыштыжо тунемше Татьяна Веденкова арала.
— Мый 4 ияш гычак куштем. Тӱҥалтыште «Кристалл» ансамбльыш спортивный бальный куштымашыш коштынам. Тыгак чонемлан эстраде, эрвел куштымашат лишыл улыт. Кызыт мый шкем утларакшым тачысе илышлан келшен толшо куштымаште шуарем. Мыйын шонымаште, куштымаш чонем утларак почын пуаш полша. Тылеч посна йот йылмым тунемам , — каласыш ӱдыр.
Конкурсышто Т.Веденкова марий калыкнан мифше гыч герой нерген каласкала, тудын дене оҥайын палдара. Тыгак Юл кундем гыч Тачана-шамыч социальный проектыштым жюри ончыко аклаш луктыт, калык вургемым чиен, моторлыкыштым, шкеныштым сценыште кучен моштымыштым ончыктат.
— Тиде идалык волонтерлан пӧлеклалтын. Санденак шӱм йодмо сомылем кугешнымашым луктеш, вет мый школ гычак волонтёр пашашке ушненам. Еҥ-влакын таумутышт мылам эм гай. Нунын поро шинчаончалтышышт пашам ышташ утларак вийым пуат. А «Юл кундемын Татьянаже» конкурсыш логалаш манын, университет кӧргыштӧ шокте гоч эртенам. Ямдылалташ мылам йолташем да вузын пашаеҥже-влак чот полшеныт. Нунылан моткоч кугу таум каласем. Марий Элын чапшым конкурсышто кӱшнӧ кучаш товатлем, — каласыш Татьяна.
Ме Татьяналан конкурсышто шкем сайын ончыкташ, сеҥымаш дене пӧртылаш тыланена! А Интернетыште тудлан йӱкым «Вконтакте» соцкылын «Татьяна Поволжья-2017» лаштыкыштыже пуэн кертыда.
Л.ШАБДАРОВА.
