Марий тӱняште Виктория Мамаеван лӱмжӧ пытартыш жапыште чӱчкыдын йоҥга. Теве иктаж мероприятийыште шке усталыкшым терга, тунамак волонтёр семын полышым пуа. Лӱмжӧ дене веле огыл, мотор йӱкшӧ денат ӱдырым кундемыштына палат. Шукерте огыл тудо «Марий Эл» радиош пашам ышташ пурен.
Виктория Мамаева Кужэҥер район Кугу Регеж ялыште шочын-кушкын. Пошкудо Купсола ялысе Йывансола школышто 9-ше класс марте тӱнемын. 10-11-ше класслан Йӱледӱр кыдалаш школышко куснен.
— Мер илыш деке мо кумылаҥден?
— Туныктышо-влак эреак тӱрлӧ мероприятийыш ушнаш темленыт. Уста койышем шекланеныт, очыни. Тыгак мо да кушто эртымым интернет лаштыклаште эскерен шогенам. Полшаш ӱжыныт гын — келшенам, уке гын — ушнаш шке йодын омыл. Ӧрмалгенам. «Ал саска», «Мурсескем», университетыште «Марий мурсем» ансабльлаш коштмемат шӱкалтышым ыштеныт. Еҥ коклаште шкем лӱддымын кучаш туныктеныт.
— «Мурсескемым» палыдымыже Марий Элыште укеат, шонем. Вика, тый тудо уста коллективын ик еҥже улат. Кунамсек тушто куштет?
— Изиракем годым изам дене пырля репетицийлаш шӱдырнен коштынам. Тидланже вес ялыш, Йывансолаш, каяш кӱлын. Йӱрат, лавырат, поранат чарен огытыл. Еҥ ок сите ала вес амаллан кӧра южгунам кушташат шогалтеныт. 10-шо классым пытарымекем коллективыш ушнаш ӱжыныт.
Ансамбльлан кӧра шуко сӧрал верыште лияш логалын. Ӱмаште Эстонийыш, Саратовыш мийыме. Тудо ийынак, ноябрь тылзыште, Моско олаште Надежда Бабкинан «Русская песня» театрыштыже выступатленна. Кумдан палыме артист дене ик концертыште пырля лийынна, кутыренна. Мария Шукшинам, Пятницкийын хоржым вашлийынна.
— Ме тый денет Марий самырык тукым слётышто палыме лийынна. Лишкыракше «Ӱдырсий» конкурс деч вара кутыраш туҥалынна…
— 2017 ийыштак слётыш ӱжыныт ыле. Мый лӱдынам ала-мо — тидлан келшен омыл. Мероприятий эртымеке интернет, радио, телевизор, газет – чылан тудын нерген ойлаш тӱҥальыч. Молан каен омыл манын шкем пеш вурышым. Вес слётышкыжо ушнашак шонен пыштышым. Тыгак лие.
«Кугу лиям, мыят «Ӱдырсийыште» вием терген ончем», — манынам ыле ончыч. Ӥӧршын вучыдымын ты шонымашемат шукталте. «Пампалче», «Ончышо-влакын симпатийышт» номинацийлаште сеҥенам. Сӱан йӱла денат ончыко лектынам.
Мылам, марий еҥлан, тиде пеш пайдале мероприятий. Школышто тунеммем годымат шке районышто эртаралтше «Марий ӱдыр – Сылне ӱдыр» конкурсышто вием тергенам. Кок ий почела сеҥышыш лектынам.
— Кызыт Марий кугыжаныш университетыште марий йылме да литератур, тӱҥалтыш класс туныктышылан тунемат. Молан тиде профессийым ойырен налынат?
— Эре школла модынам. Шарнем, ковам шӱдем да диктантым возаш шындем ыле. Тудыжат нигунам тореш лийын огыл. Ручкам, кагазым налын, кӱштымем шуктен. Коча ден ковам туныктышо лийыныт, тидыжат профессийым ойырен налаш шӱкалтышым ыштен. Ынде кокымшо курсышкат шуым.
— Радиош кузе логалынат?
— «Полмезын йӱкшӧ» передачыште икмыняр гана уна лийынам. Радион эртарыме пайремлашке волонтёр семын ушненам. Шукерте огыл шкем терген ончаш ӱжыктеныт. Тыге, ик кечылан толшо, ты пашаш кодынам. Ончыкыжымат тыште тыршаш тӱҥалам манын ушанем.
-Вика, марий тӱвыра курымеш илыже маным мом ме ыштен кертына?
— Тӱвыра, шочмо йылме деке йӧратымаш изи годымак чоныш шыҥен ок пуро гын, кугурак лиймеке тиде шижмашам ылыжташ нелырак. Садлан еш, школ гыч тӱҥалаш кӱлеш.
— Тау!
