18 гыч 21 июнь марте Йошкар-Олаште «Марий юнкор – 2023» усталык школ эртаралтеш. Тудо 15-ше юнкор слётым алмаштен. Марий Элысе тӱрлӧ школла гыч толшо 15 ӱдыр-рвезым И.С.Палантай лӱмеш республиканский тӱвыра да сымыктыш колледжын Национальный гимназийже шке помышешыже налын. Усталык школын пашаже нерген «Ямде лий» газетын тӱҥ редакторжо Людмила ГРИГОРЬЕВА каласкала:
– Кеҥежымсе школТуныктышын да наставникын идалыкшылан пӧлеклалтын, адакшым вес кугу амалат уло – «Ямде лий» газетын икымше номерже лекмылан тений 1 февральыште 90 ий темын. Икымше кечын юнкор-влак икте-весышт дене палыме лийыныт, гимназий мучко ончен коштыныт, журналистике дене икымше занятийыште лекцийым колыштыныт.
Торжественный ужашым йыргешке ӱстел семын чумыраш кутырен келшышна. Йоча-шамыч вуйлатыше-влакын шинчашкышт ончалын, нунылан йодышым пуэденыт да вашмутым налыныт. Уна-влак коклаште Марий Элын тӱвыра, печать да калык-влакын пашашт шотышто министрын алмаштышыже Михаил Матвеев, Образований да воспитаний министрын алмаштышыже Валентина Гаврилова, Марий Эл Кугыжаныш Погын председательжын алмаштышыжын полышкалышыже, калык писатель Александр Петров, «Марий Эл» газет ООО-н директоржо Александр Абдулов, «Кугарня газет» – «Марий Эл» савыктыш пӧрт» ГАУК-ын директоржо Эдуард Иманаев, Тӱвыра министерствын печать шотышто пӧлкан пашаеҥже Татьяна Соловьева лийыныт.
Чуваш республикысе Новочебоксарск ола гыч «Грани» савыктыш пӧртын пашаеҥжым вучена. Тудынат мастер-классше пайдале лийшаш, шонена.
Программе пеш поян. Республикыштына у технологий дене пашам ыштыше креатив школым икымше гана почмо – газет паша деке лишке мастер-класс-влакым ончыктынена. Кӧ пала, ала иктаж-кудо йочан ончыкыжым тыште тунемаш кумылжо лектеш. «Цветик-семицветик» кином сниматлымашке (тушто Национальный гимназийын тунемшыже-влакат модыт), МЭТР телевидений ден радиошко да моло вереат каяш палемденна.
Но тӱҥ сомылна – юнкор-влакын возымо мастарлыкышт могай кӱкшытыштӧ улмым рашемдаш, шинчымашыштым келгемдаш, ой-каҥашым пуаш. Марий Элын калык поэтше-влак Геннадий Сабанцев, Зоя Дудина кажне юнкор дене индивидуальный занятийым эртараш кумылыштым ончыктеныт, моло поэт, писатель-влакат слётын пашашкыже ушненыт
Моло ийлаште юнкор слёт вич-шым, кунамже лу кечат шуйнен. Тений жап кӱчыкырак чучеш. Но икмыняр ий кӱрылтыш деч вара уэш чумырген кертмылан мый Марий Элын тӱвыра, печать да калык-влакын пашашт шотышто мнистерствылан кугу таум ойлем. Усталык школ уэш ончыкыжымат шуйна манын ӱшанен кодына.
Л.СЕМЕНОВА
Н.Токтарован фотожо