21 мартыште Морко район Унчо селаште республик кӱкшытан «Ӱярня» йоча пайрем эртыш. Тудо районын 100 ияш да Марий тӱвыра рӱдерын 25 ияш лӱмгечыштлан да Еш идалыклан пӧлеклалтын.
Пайремыш Морко районысо Унчо, Шеҥше, Нуж-Ключ, Коркатово (лицей), Советский район гыч Ӱшнӱр, Параньга посёлкысо да Кугу Пумарий, Волжский районысо Пӧтъял школла, тыгак У Торъял тӱвыра да каныме рӱдер гыч команде-влак ушненыт. Верысе тӱвыра пӧртыштӧ сылне марий вургеман ӱдыр-рвезе-влакым ужын, чон куанен, кумыл нӧлталтын, а нунын кӱэшт кондымо мелнашт шӱвылвӱдым луктын!
Пайремым почмаште Морко муниципал район вуйлатыше, районысо депутат-влак погын председатель Светлана Иванова, район администраций вуйлатышын алмаштышыже Алексей Васильев,
Марий Эл Кугыжаныш Погын депутат Юрий Игнатьев, Унчо ял шотан илем администраций вуйлатыше Иван Евсеев, верысе школ вуйлатыше Андрей Григорьев да Марий тӱвыра рӱдер вуйлатыше Василий Петров саламленыт. Нуно кугезе тукымнан йӱлажым, тӱвыражым арален кодаш да тукым гыч тукымыш шуяш, икте-весылан полшен, пырля келшен илаш тыланышт.
«Ӱярня такмак» конкурс участник-влакын уш-акылыштым пудыраташ таратыш. Икмыняр жапыште нунылан «ӱярня», «ӱярня вара», «мелна», «мунчалташ» мут-влакым кучылтын, такмакым шонен муаш кӱлын. Ты шотышто кажне команде ойыртемалтше да оҥай корнылам муын да сценыште гармонь, тӱмыр почеш муралтыш.
Мелна деч посна могай Ӱярня? Коҥгаште кӱэштме чевер мелна кышылат, шӱльӧ, шыдаҥ, шож ложаш гыч вичкыж ма кӱжгӱрак мелнаже могай гына форман да могай гына кӧрган лийын огытыл?! Пӧтъял школын тунемшыже-влакын вичкыж мелна дене ыштыме курчакышт чылт озавате семынак койын шоген. Жюри мелнан вужгата да тамле улмыжым, моторын сӧрастарыме деч посна марий кочкыш нерген сайын палымым да оҥайын каласкален моштымым аклен.
Кечывал деч вара пайрем уремыш куснымыж дене пуйто кокымшо шӱлышым нале. Кечан игечылан йывыртен, изижге-кугужге модын юарленыт, курык гыч ватрушко але ӱярнявара дене, мужыр-мужыр шогалын, мунчалтеныт.
Шлань тӱвыра пӧрт пеленысе «Эр кече» ансамбльын чолга ӱдырамашыже-влакын, сылне мурым йоҥгалтарен, оҥгыран имне дене сцене деке кудалын толмышт шукыштым ӧрыктарыш, вет лач тыге ожно кугезе тукымнат Ӱярням пайремлен. Оҥгыр йӱк участник-влакымат ик верыш чумырыш. Ӱдыр-рвезе-влак «Ӱярня кува» конкурслан пайремын символжо нерген каласкалышт. А тудыжлан кажне команде ойыртемалтше лӱмым пуэн: Ӱялче, Унчывий, Шымалче, Чачавий… Ӱярня кува нерген иктышт кугезе-влакын каласкалымыштлан эҥертеныт гын, весышт такмак семын оҥайын келыштареныт.
Самырык тукымлан ече дене ӱчашен куржаш, мешак дене тӧрштылаш веле огыл, ведра да вӱдвара, тыгак салма да салмавондо, маскайол дене куржталын таҥасаш чот келшен. «Картакваҥга» модышат ӱдыр-рвезе-влакым сайынак пӱжалтарыш.
– Пайрем моткоч келшен. Йоча Ӱярня ӱмаште мемнан дене, Кугу Пумарий школышто, эртен, садлан можым, кузежым ме сайын паленна. Унчышто моткоч поро шӱлышан, унам вашлийын моштышо калык ила. Тыште самырык тукымат кугезе йӱлам пален кушкеш, – каласышт пошкудо район гыч толшо весела кумылан ӱдыр-влак.
А мучашлан сылне муро, сем почеш, кугу оҥгыш шогалын, чыланат рӱж тавалтеныт, вӱдла йоген, икте-весылан тауштен, вес гана вашлиймешке чеверласеныт.
Калыкнан тошто годсо пайремжым йоча-влаклан эртарыме пеш кӱлешан. Тыге самырык тукымат йӱланам, тӱвыранам пален кушкеш.
Тӱрлӧ конкурсышто сеҥыше-влак:
«Ӱярня мелна»
I вер – У Торъял тӱвыра да каныме рӱдерын «Онар тукым» команде;
II вер – Волжский районысо Пӧтъял кыдалаш школын командыже;
III вер – Морко районысо Шеҥше кыдалаш школын «Кечыйол» командыже.
«Ӱярня такмак»
I вер – Б.Р. Ахматьянов лӱмеш Параньга кыдалаш школын «Кече йол» командыже;
II вер – У Торъял тӱвыра да каныме рӱдерын «Онар тукым» командыже;
III вер – Советский районысо Ӱшнӱр кыдалаш школын «Ӱшан» командыже;
«Ӱярня кува»
I вер – Параньга районысо Кугу Пумарий школын «Самырык тукым» командыже;
II вер – Волжский районысо Пӧтъял кыдалаш школын командыже
III вер – Б.Р. Ахматьянов лӱмеш Параньга кыдалаш школ «Кече йол» командыже;
Алевтина БАЙКОВА
Авторын фотожо
