«МАРИЙ ЭЛ» ТАЧЕ

Изи гармончо-влакын усталыкышт

Кодшо шуматкечын Марий самырык театрын залыштыже изи гармонист-влакын конкурсышт лийын.

Тудым икымше гана республикысе Марий тӱвыра рӱдер эртарен. Мероприятий фойеште гармонь почеш марла мурен муштымаш гыч тӱҥалын. Тыштак Киров область гыч Василий Петуховын да Марий Эл гыч Александр Ивановын чумырымо гармонь коллекцийышт ончыкталтыныт. Кок мастаржат гармоньым устан шоктат веле огыл, эше тудым олмыктат.  

Регион-влак кӱкшытан конкурсыш чылаже 14 гармоньчо ушнен. Нуно республикысе куд  да Пошкырт кундемын кок районжо гыч лийыныт. Изирак ийготан лийыныт гынат, усталыкыштлан, сценыште шкем кучен моштымыштлан ӧраш гына  кодеш. Кажныжым залыште шинчыше-влак шокшын вашлийыныт. Иктышт гармонь дене шоктен муреныт, весышт шӱвырым оҥареныт, тӱмырым кыреныт. Совла дене перкалыше, шӱшпык дене шӱшкышӧ, кӱсле дене шоктышат лийыныт.

Конкурс Педагог ден наставникын идалыкыштлан пӧлеклалтын да «Талешке корно дене» месячник кышкарыште эртен.

С.Носова

Р.Николаеван фотожо

Опубликовать в Одноклассники

Добавить комментарий