Марий Элым вуйлатыше Торым погымо шотышто регионысо штабын заседанийжым эртарен.
Марий Элын чоҥымаш, архитектур да илыме-коммунал озанлык министржын пашажым шуктышо Александр Горбунов торым погымо сферыште кызытсе сӱретым почын ончыктен да ончыкылан тӱҥ задаче-влакым палемден.
Таче регионыштына пеҥгыде коммунал торым 92 спецтехнике пога, тений эше кандашым налаш палемдыме. Чыла контейнер площадке ден контейнер пеҥгыдемдыме нормылан келшен толыт да калыклан илемым яндарын кучаш полшат.
Пашашке «ТКО водитель» приложенийым пуртымо. Тудын полшымыж дене торым оптен наҥгайыме жап ден контейнер площадке-влакым эрыктыме качествым эскераш, тыгак лекше йодышлам писынрак рашемдаш да сервисым саемдаш йӧнан.
Регионыштына пеҥгыде коммунал торым погымо объект-влакым видео полшымо дене эскерыме системат вияҥын толеш. Тымарте Йошкар-Оласе контейнер площадкылашке кум камерым шындыме, 2025 ий мучаш марте эше лум вераҥдаш палемдыме.
Таче кечылан пеҥгыде коммунал торым оптымо 10 полигонышто (чылаже – 13) висыме оборудований-влакым шындыме, шӱкым ойырымо кок комплексыштат кӱлешан оборудованийым тичмашнек ситарыме – тиде инфраструктурым саемдыме пеш сай ошкыл.
«Экологийым арален кодымо йодыш ик эн ончыч шукташ палемдыме паша радамыштак кодеш», – заседанийым мучашлымыж годым палемден республикым вуйлатыше.
Марий Элым вуйлатышын пресс-службыжын уверже негызеш Маргарита Иванова ямдылен.
