Марий Элым вуйлатышын пашажым жаплан шуктышо Юрий Зайцев Шернур кундемыш миен коштмыж годым Марисола школышкат пурен.
Шинчымашым пуымо тӧнежым кызыт «Образованийым вияҥдымаш» кугыжаныш программын «Образованийын школ системыже-влакым модернизироватлымаш» регионысо проектшым илышыш пуртымо кышкарыште капитально олмыктат. Объект 56 процентлан ямде. Пашам 57 миллион теҥгелан аклыме. Школым 25 август марте чоҥен пытараш палемдыме. Тымарте коммуникацийым вашталтыме, электромонтаж пашам мучашлыме, кочмыверлан мебельым налме, помещений кӧргым олмыктымо. Но проектыште омсам вашталташ да коридорышто туврашым олмыкташ кӱлмым ончыктымо огыл.
Республикым вуйлатышын пашажым жаплан шуктышо чылажымат кызытсе жапын йодмашыже-влаклан келшышын ышташ кӱлмӧ нерген ойлен да проектыш пуртыдымо пашалан 5,4 миллион теҥгем ешарен ойыраш кӱштен.
Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен
