КУЧЕМЫШТЕ

Чолга да талантан тунемше дене вашлиймаш

Петербургысо XXV тӱнямбал экономике форумын программыжым Марий Элым вуйлатышын пашажым жаплан шуктышо Юрий Зайцев  тиде кугу мероприятийын участницыже, Бауман лицейын тунемшыже, «Большая перемена» конкурсышто сеҥышыш лекше Маргарита Жирова дене вашлиймаш дене мучашлен.

Ӱдырын экологий мешак-шамычым ямдылыме дене кылдалтше «Мешоchek» проектшым жюри член-влак кызытсе жапын йодмашыжлан келшен толшылан шотленыт. Юрий Зайцев дене вашлиймаште Маргарита тиде пашаже да моло сеҥымашыже нерген каласкален. Тыгак мер илышыже, музыкальный школышто тунеммыже, самырык-влакын «12» лидер-командышкыже улмыж дене палдарен. Ӱдырын мутшо почеш, тудын эн тӱҥ эҥертышыже – аваже. «Авам мыйым эреак виктарен шоген, полшен. Тудо – тӱҥ наставникем. Тиде але тудо корным ойыраш эрык эреак лийын», – ешарен Маргарита.

Икымше кугу сеҥымашыже – начар тазалыкан йоча-влаклан занятийым эртараш музыкальный оборудованийым налаш Росмолодёжь деч грант. Еҥ-влаклан полышым пуаш кумылан Маргаритан элна мучко йолташыже моткоч шуко, кызытак 500 утла погына. А Петербургысо тӱнямбал экономике форум нерген тудо ӱмаште гына пален налын. «Тушто лийше йолташем-влак тиде мероприятий нерген каласкаленыт, тыгодым нунын шинчашт туге йӱлен – мыйынат тушто лийме шуын колтен. Тений «Большая перемена» конкурсышто бизнес шонымашем дене палдараш йӧн лийын. Мый шке пашам ончыктенам да сеҥенам», – ойла Маргарита.

Ӱдыр ешарен: кызыт тудын эн тӱҥ йодышыжо – ончыкылык профессийым ойыраш. Марий Элым вуйлатышын пашажым жаплан шуктышо базовый специальностьым налаш каҥашым пуэн да палемден: республикын Правительствыже талантан икшыве-влаклан эреак полышым пуышаш. Тыгак тудо ответственный еҥ-влаклан Маргарита дене кылым кучаш да кӱлеш годым полшаш кӱштен.

«Моткоч чолга улат. Шке вий-куатет дене молымат кумылаҥдет – молодец», – мокталтен каласен Юрий Зайцев.

Марий Эл Республикым вуйлатышын организаций да аналитике виктемжын уверже негызеш Г.Кожевникова ямдылен.

Опубликовать в Одноклассники

Добавить комментарий