Регионын парламентарийже-влак «МолодЙошка» форумын спикерже лийыныт.
Мероприятий 15-19 августышто «Авангард» рӱдерыште эртен. Тушко 200 утла самырык еҥ ушнен. Форумын кышкарышкыже тренинг шотан занятий, лекций, мастер-класс, акций, таҥасымаш-влакым, федерал, округ да регион кӱкшытан эксперт-шамыч дене вашлиймашлам, молодёжный проект-влакын конвейерыштым, тӱвыра да каныме, спорт, турист-краевед программылам да шуко молым пуртеныт.
Образовательный программе куд тематический трек: «Госстарт», «Молодёжьын йӱкшӧ», «Селалан проект-влак», «Креативный мастерской», «Молодёжьын флагманже-шамыч», «Келшымашын тӱнямбал клубшо» – дене эртен.
Пытартыш трекын спикерже Кугыжаныш Погын председательын икымше алмаштышыже, Россий калык-влак ассамблейын регионысо пӧлкажын председательже Лариса Яковлева лийын. Тудо поснак кугу тӱткышым тӱрлӧ калык гыч улшо самырык еҥ-влак коклаште вашла умылымо да пагалыме йодышлан ойырен.
Темым лончылымо годым Наталья Пушкинат шке шонымашыжым ойлен.
Кугыжаныш Погын председательын алмаштышыже, спецоперацийын ветеранже Александр Смирнов «Российын лидерже-влак. Политике. Конкурс – цель огыл, а корнын ужашыже» интерактивный лекцийын спикерже лийын.
Тудо самырык-шамычлан Россий президентын кӱштымыж почеш илышыш пурталше «Российын лидерже-влак» проектыш ушнымыж нерген каласкален. Александр Смирнов тений «Российын лидерже-влак. Политике» конкурсын очный йыжыҥыштыже финалыш лекше 105 еҥ коклашке логалын.
Депутат проект пашаште участвоватлымыж денат палдарен. Советский районышто почмо Самырык-влакын рӱдерыштым тудын саскажлан шотлыман. А Президент грант-влак конкурсышто участвоватлымыж дене республикыштына калыклан юридический полышым яра пуымо «Калык юрист» проектым илышыш пуртымо.
«Шонымашда уло, да тудо кӱлешан гын, чарнен ида шогал. Тудын деч лектышым налза. Чылажат – тендан кидыште», – самырык-влакым кумылаҥден Александр Алексеевич. Ветеран тыгак кажне пӧръеҥын армийыште служитлаш кӱлмыжым палемден.
Спикер – шуко шочшан ача, да тудо трекыште участвоватлыше-влакын еш дене кылдалтше йодышыштланат кумылын вашештен.
Маргарита ИВАНОВА ямдылен.
Марий Эл Кугыжаныш Погынын пресс-службыжын фотожо.
