Марий Элым вуйлатыше Юрий Зайцев «Кумыл кож» поро кумыл акцийыш ушнен.
22 декабрьыште Ю.Зайцев Кремльыште кож гыч у ий шарым налын да Марий Эл гыч Алина Смирнован планшетан лияш шонымыжым пален налын.
Алиналан – 10 ий, тудын ачаже специальный военный операцийыште участвоватла, элым аралаш доброволец семын каен.
Кумыл кожышто Алинан акажынат шарже кечен. Кудымшо классыште тунемше Лейсан пӧлек шотеш ноутбукым вуча.
Ю.Зайцев ака-шӱжарым когыньыштымат куандараш шонен пыштен.
– Тыгай акций улмылан пеш куанем. Йоча-влак У ийым шке семынышт вучат, да ме, кугыеҥ-влак, тыгай сай пайрем вашеш нуным куандарышаш улына. Алина ден Лейсанын шонымашыштлан шукталташ кумылын полшем, – манын тудо.
Марий Эл Республикым вуйлатышын администрацийжын увер паша пӧлкажын уверже негызеш М.ИВАНОВА ямдылен
