Москваште школышто тунемше-влаклан руш литератур дене всероссийский олимпиадын пытартыш этапше лийын. Тушто Марий Эл гыч Т.В.Иштрикова лӱмеш «Канде кайык» гуманитарный гимназийын тунемшыже Александра Лесикова (снимкыште) призёр радамыш лектын.
Олимпиадыште Российын 84 регионжо гыч 309 тунемше шинчымашым ончыктен. Нуно чылаже кум турым эртеныт: йот йылме дене возымо текстлан анализым ыштеныт, творческий пашаште усталыкым тергеныт, а йодыш-влаклан вашештеныт.
«Кокымшо турышто заданий-шамыч моткоч неле лийыныт. А кумшышто мыланем Александр Сергеевич Пушкин илышыже да пашаже дене кылдалтше йодыш-влак логалыныт. Нунылан вашешташ манын, историйымат «пургедаш» логалын. «Канде кайык» гимназийын туныктышыжо-влаклан тау: чыла гуманитарный дисциплине дене келге шинчымашым пуат!» – каласен Александра.
Г.Кожевникова
(Фото — Марий Эл Образований да науко министерстве гыч)
