«Образований» национальный проектын «Кызытсе школ» федеральный проектше почеш, Волжск оласе лицейыште ешартыш шинчымашым пуышо «Кванториум» йоча технопарк почылтын.
Марий Эл образований да науко министр Лариса Ревуцкая палемден: тиде кумдык кажне йочан усталыкшым вияҥдаш йӧным ыштыше площадке лийшаш. Тудо тыгак лицейын туныктышыжо да тушто тунемше-влакын ача-аваштым пӧлем-шамычым ямдылаш полышым пуымыштлан тауштен.
Технопаркыште цифран лабораторий, робототехнике усталыкым вияҥдаш да профилян предметлам тунемаш кызытсе жаплан келшыше оборудований-шамыч улыт. Лицейыште тыгак кеҥеж каныш жапыште инженер профессий дене кылдалтше профилян сменым эртараш, проект пашам ышташ факультатив да электив курс-влакым почаш да тунемше-шамычым олимпиаде ден конкурслан ямдылаш йӧн лиеш.
Тыгай технопарк Волжск олаште – икымше, но пытартыш огыл: 2024 ийыште тыште эше ик тыгай кумдыкым почаш палемдыме.
Г.Кожевникова
Фотом Марий Эл Образований да науко министерствын сайтше гыч налме
